ಬ್ಲೂ ಕಾರ್ಬನ್ ಸಂರಕ್ಷಣೆಗೆ ಎನ್‌ಐಟಿಕೆ–ಇಎಂಪಿಆರ್‌ಐ ಸಹಯೋಗ – ತಿಳುವಳಿಕಾ ಒಪ್ಪಂದಕ್ಕೆ ಸಹಿ
ಕರಾವಳಿ ಪರಿಸರ ವ್ಯವಸ್ಥೆಗಳ ಸಂರಕ್ಷಣೆ, ಮ್ಯಾಂಗ್ರೋವ್ ಪುನಶ್ಚೇತನ ಹಾಗೂ ಹವಾಮಾನ ಬದಲಾವಣೆ ನಿಯಂತ್ರಣಕ್ಕೆ ವೈಜ್ಞಾನಿಕ ಮತ್ತು ನೀತಿ ಆಧಾರಿತ ಕ್ರಮಗಳನ್ನು ಬಲಪಡಿಸುವ ಉದ್ದೇಶದಿಂದ ಎನ್‌ಐಟಿಕೆ ಸುರತ್ಕಲ್ ಮತ್ತು ಬೆಂಗಳೂರಿನ ಪರಿಸರ ನಿರ್ವಹಣೆ ಮತ್ತು ನೀತಿ ಸಂಶೋಧನಾ ಸಂಸ್ಥೆ (ಇಎಂಪಿಆರ್‌ಐ) ನಡುವೆ ತಿಳುವಳಿಕಾ ಒಪ್ಪಂದಕ್ಕೆ ಸಹಿ ಹಾಕಲಾಯಿತು.
ಎನ್‌ಐಟಿಕೆ ಸುರತ್ಕಲ್‌ನಲ್ಲಿ ಅಕ್ಟೋಬರ್ 14ರಂದು ನಡೆದ ‘ಬ್ಲೂ ಕಾರ್ಬನ್ ಪರಿಸರ ವ್ಯವಸ್ಥೆಗಳು ಮತ್ತು ಮ್ಯಾಂಗ್ರೋವ್ ಯೋಜನೆಗಳು’ ಕುರಿತ ಉನ್ನತ ಮಟ್ಟದ ಹಿತಾಸಕ್ತಿದಾರರ ಸಭೆಯಲ್ಲಿ ಈ ಒಪ್ಪಂದಕ್ಕೆ ಸಹಿ ಹಾಕಲಾಯಿತು. ಕರ್ನಾಟಕದ ವಿವಿಧ ಜಿಲ್ಲೆಗಳ ಸುಮಾರು 80 ನೀತಿ ನಿರೂಪಕರು, ವಿಜ್ಞಾನಿಗಳು, ಆಡಳಿತಾಧಿಕಾರಿಗಳು, ಶಿಕ್ಷಣ ತಜ್ಞರು ಹಾಗೂ ಅರಣ್ಯ ಇಲಾಖೆ ಅಧಿಕಾರಿಗಳು ಭಾಗವಹಿಸಿದ್ದರು.
ಕರ್ನಾಟಕ ನೆಟ್ ಜೀರೋ ಟಾಸ್ಕ್ ಫೋರ್ಸ್ ಉಪಾಧ್ಯಕ್ಷ ಹಾಗೂ ರಾಜ್ಯದ ಹವಾಮಾನ ಸಲಹೆಗಾರ ಉಪೇಂದ್ರ ತ್ರಿಪಾಠಿ, ಪರಿಸರ ಮತ್ತು ಪರಿಸರಶಾಸ್ತ್ರ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಹಾಗೂ ಇಎಂಪಿಆರ್‌ಐ ಮಹಾನಿರ್ದೇಶಕ ಶ್ರೀನಿವಾಸಲು, ಅರಣ್ಯ ಇಲಾಖೆಯ ಮುಖ್ಯ ಅರಣ್ಯ ಪಡೆ ಅಧಿಕಾರಿ ಡಾ. ಮೀನಾಕ್ಷಿ ನೇಗಿ, ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ., ಮಂಗಳೂರು ವಲಯದ ಅರಣ್ಯ ಸಂರಕ್ಷಣಾಧಿಕಾರಿ ಕಮಲಾ ಹಾಗೂ ಎನ್‌ಐಟಿಕೆ ನಿರ್ದೇಶಕ ಪ್ರೊ. ಬಿ. ರವಿ ಸಭೆಯನ್ನು ಉದ್ಘಾಟಿಸಿದರು.
ನೆಟ್ ಜೀರೋ ಗುರಿ ಸಾಧನೆಗೆ ಸಹಯೋಗ ಅಗತ್ಯ:
ರಾಜ್ಯದ ನೆಟ್ ಜೀರೋ ಗುರಿ ಸಾಧಿಸಲು ವಿವಿಧ ಸಂಸ್ಥೆಗಳ ಸಹಯೋಗದೊಂದಿಗೆ ವಿಸ್ತರಣೀಯ ಪರಿಸರ ಯೋಜನೆಗಳನ್ನು ರೂಪಿಸುವ ಅಗತ್ಯವಿದೆ ಎಂದು ಉಪೇಂದ್ರ ತ್ರಿಪಾಠಿ ಹೇಳಿದರು. ಮುಂದಿನ ಐದು ವರ್ಷಗಳಲ್ಲಿ ಐದು ಲಕ್ಷ ಟನ್ ಇಂಗಾಲ ಹೊರಸೂಸುವಿಕೆಯನ್ನು ಕಡಿಮೆ ಮಾಡುವ ಗುರಿಯೊಂದಿಗೆ ಯೋಜನೆಗಳನ್ನು ರೂಪಿಸಬಹುದು. ಇಂತಹ ಉಪಕ್ರಮಗಳಿಗೆ ಎನ್‌ಐಟಿಕೆ ಮತ್ತು ಇಎಂಪಿಆರ್‌ಐನ ತಾಂತ್ರಿಕ ಪರಿಣಿತಿ ಹಾಗೂ ಸರ್ಕಾರದ ಸಾಂಸ್ಥಿಕ ಬೆಂಬಲ ದೊರೆಯಲಿದೆ ಎಂದು ತಿಳಿಸಿದರು.
ಹವಾಮಾನ ಕ್ರಮಗಳು ಕೇವಲ ದಾನಧರ್ಮಕ್ಕೆ ಸೀಮಿತವಾಗದೆ ಹಸಿರು ಆರ್ಥಿಕ ಬೆಳವಣಿಗೆ, ಉದ್ಯೋಗ ಸೃಷ್ಟಿ, ಹೂಡಿಕೆ ಮತ್ತು ಕಾರ್ಬನ್ ಹಣಕಾಸಿಗೆ ಅವಕಾಶ ಕಲ್ಪಿಸುತ್ತವೆ ಎಂದು ಶ್ರೀನಿವಾಸಲು ಅಭಿಪ್ರಾಯಪಟ್ಟರು.
ಮ್ಯಾಂಗ್ರೋವ್‌ಗಳು ಕರಾವಳಿಯ ನೈಸರ್ಗಿಕ ರಕ್ಷಣಾ ಕವಚ:
ಮ್ಯಾಂಗ್ರೋವ್ ಪರಿಸರ ವ್ಯವಸ್ಥೆಗಳು ಇಂಗಾಲವನ್ನು ಸಂಗ್ರಹಿಸುವುದರ ಜತೆಗೆ ಚಂಡಮಾರುತ ಮತ್ತು ಸುನಾಮಿಗಳಂತಹ ನೈಸರ್ಗಿಕ ವಿಕೋಪಗಳ ಪರಿಣಾಮವನ್ನು ತಗ್ಗಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ ಎಂದು ಅರಣ್ಯ ಸಂರಕ್ಷಣಾಧಿಕಾರಿ ಕಮಲಾ ಹೇಳಿದರು. ಮ್ಯಾಂಗ್ರೋವ್‌ಗಳನ್ನು ಪರಿಣಾಮಕಾರಿ ಕಾರ್ಬನ್ ಸಂಗ್ರಹಗಳಾಗಿ ಅಭಿವೃದ್ಧಿಪಡಿಸಲು ಅರಣ್ಯ ಇಲಾಖೆ ಎನ್‌ಐಟಿಕೆ ಮತ್ತು ಇಎಂಪಿಆರ್‌ಐ ಜತೆ ಕಾರ್ಯನಿರ್ವಹಿಸಲು ಸಿದ್ಧವಿದೆ ಎಂದು ತಿಳಿಸಿದರು.
ಹವಾಮಾನ ಕ್ರಮಗಳಲ್ಲಿ ವಿಜ್ಞಾನ, ಸಾಮಾಜಿಕ-ಆರ್ಥಿಕ ಅಂಶಗಳು ಹಾಗೂ ಸರ್ಕಾರ ಮತ್ತು ಸಮುದಾಯಗಳ ಸಹಭಾಗಿತ್ವ ಮುಖ್ಯ ಎಂದು ಡಾ. ಮೀನಾಕ್ಷಿ ನೇಗಿ ಹೇಳಿದರು. ಮ್ಯಾಂಗ್ರೋವ್ ಮತ್ತು ಅರಣ್ಯ ಪರಿಸರ ವ್ಯವಸ್ಥೆಗಳು ಕಾರ್ಬನ್ ಕ್ರೆಡಿಟ್ ಸೃಷ್ಟಿಗೆ ಅವಕಾಶ ಹೊಂದಿವೆ. ಇಂತಹ ಯೋಜನೆಗಳ ಪ್ರಯೋಜನ ಜನರಿಗೆ ತಲುಪಲು ಜಿಲ್ಲಾಡಳಿತದ ಸಹಕಾರ ಅಗತ್ಯ ಎಂದು ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ. ಅಭಿಪ್ರಾಯಪಟ್ಟರು.
ಸಂಶೋಧನೆ, ನೀತಿ ರೂಪಣೆ ಮತ್ತು ಅನುಷ್ಠಾನಕ್ಕೆ ಒತ್ತು:
ಎನ್‌ಐಟಿಕೆ ನಿರ್ದೇಶಕ ಪ್ರೊ. ಬಿ. ರವಿ ಅವರು ಸಂಸ್ಥೆಯ ಹಸಿರು ಉಪಕ್ರಮಗಳನ್ನು ವಿವರಿಸಿ, ಸ್ಥಳೀಯ ಪರಿಸರ ಸಮಸ್ಯೆಗಳಿಗೆ ಜಾಗತಿಕ ಮಟ್ಟದ ಸಂಶೋಧನಾ ಪರಿಣಿತಿಯನ್ನು ಬಳಸುವ ಅಗತ್ಯವನ್ನು ಒತ್ತಿಹೇಳಿದರು. ಸಾಗರ ಎಂಜಿನಿಯರಿಂಗ್ ಮತ್ತು ಬ್ಲೂ ಎಕಾನಮಿ ಕ್ಷೇತ್ರಗಳಲ್ಲಿ ಹೊಸ ಪದವಿ ಹಾಗೂ ಸ್ನಾತಕೋತ್ತರ ಕಾರ್ಯಕ್ರಮಗಳನ್ನು ಆರಂಭಿಸುವ ಮಹತ್ವವನ್ನೂ ಪ್ರಸ್ತಾಪಿಸಿದರು.
ಎನ್‌ಐಟಿಕೆ ಮತ್ತು ಇಎಂಪಿಆರ್‌ಐ ನಡುವಿನ ಒಪ್ಪಂದವು ಹವಾಮಾನ ಕ್ರಮಗಳು, ಬ್ಲೂ ಕಾರ್ಬನ್ ಪರಿಸರ ವ್ಯವಸ್ಥೆಗಳ ಸಂರಕ್ಷಣೆ, ಸುಸ್ಥಿರ ಪರಿಸರ ನಿರ್ವಹಣೆ, ಸಂಶೋಧನೆ, ನೀತಿ ಬೆಂಬಲ, ಸಾಮರ್ಥ್ಯ ಅಭಿವೃದ್ಧಿ ಹಾಗೂ ಅನುಷ್ಠಾನಾಧಾರಿತ ಯೋಜನೆಗಳಲ್ಲಿ ಸಹಯೋಗಕ್ಕೆ ವೇದಿಕೆ ಕಲ್ಪಿಸಲಿದೆ.
ಸಭೆಯ ತಾಂತ್ರಿಕ ಅಧಿವೇಶನಗಳಲ್ಲಿ ಮ್ಯಾಂಗ್ರೋವ್ ಪುನಶ್ಚೇತನ, ಕರಾವಳಿ ಕರ್ನಾಟಕದ ಬ್ಲೂ ಕಾರ್ಬನ್ ಸಂಗ್ರಹಗಳ ಮೌಲ್ಯಮಾಪನ, ಕಾರ್ಬನ್ ಮಾರುಕಟ್ಟೆ, ಕಾರ್ಬನ್ ಲೆಕ್ಕಪತ್ರ ವಿಧಾನಗಳು, ಹವಾಮಾನ ಹಣಕಾಸು ಹಾಗೂ ಪರಿಸರ ಸ್ಥಿರತೆ ಕುರಿತು ತಜ್ಞರು ವಿಚಾರ ಮಂಡಿಸಿದರು. ಎನ್‌ಐಟಿಕೆ ಸಂಶೋಧನೆ ಮತ್ತು ನವೋದ್ಯಮ ವಿಭಾಗದ ಡೀನ್ ಪ್ರೊ. ಬಿ. ರಾಮಚಂದ್ರ ಭಟ್ ಅವರು ಅಂತರಶಿಸ್ತೀಯ ಸಂಶೋಧನೆ, ತಂತ್ರಜ್ಞಾನ ವರ್ಗಾವಣೆ ಮತ್ತು ಉದ್ಯಮಶೀಲತೆ ಕುರಿತು ವಿಶೇಷ ಉಪನ್ಯಾಸ ನೀಡಿದರು.
