ಮಹಿಳಾ ಸಬಲೀಕರಣಕ್ಕೆ ಮುಲ್ಕಿಯಲ್ಲಿ ‘ಮಹಿಳೋತ್ಸವ 2026’ ಚಾಲನೆ – ಒಂಟಿ ತಾಯಂದಿರ ನೆರವಿಗೆ ₹1 ಕೋಟಿ ನಿಧಿ

ಚರ್ಚ್ ಮತ್ತು ಸಮಾಜದ ಅಭಿವೃದ್ಧಿಯಲ್ಲಿ ಮಹಿಳೆಯರು ಪ್ರಮುಖ ಪಾಲುದಾರರು – ಕಾರ್ಡಿನಲ್ ಫಿಲಿಪ್ ನೇರಿ ಫೆರಾವೊ

ಮಹಿಳಾ ಘನತೆ, ಸಮಾನತೆ ಮತ್ತು ಸಾಮಾಜಿಕ ನ್ಯಾಯವನ್ನು ಬಲಪಡಿಸುವ ಆಶಯದೊಂದಿಗೆ ಭಾರತೀಯ ಕಥೊಲಿಕ್ ಬಿಷಪ್‌ಗಳ ಮಂಡಳಿ (CCBI) ಮಹಿಳಾ ಆಯೋಗದ ಆಶ್ರಯದಲ್ಲಿ 8ನೇ ಆಲ್ ಇಂಡಿಯಾ ರಾಷ್ಟ್ರೀಯ ಮಹಿಳಾ ಸಮ್ಮೇಳನ ‘ಮಹಿಳೋತ್ಸವ 2026’ ಇಂದು ಅಕ್ಟೋಬರ್ 18ರಂದು ಭಾನುವಾರ ಮುಲ್ಕಿಯ ಡಿವೈನ್ ಕಾಲ್ ಸೆಂಟರ್‌ನಲ್ಲಿ ಆರಂಭಗೊಂಡಿತು. ‘ಸಹಭಾಗಿತ್ವದಲ್ಲಿ ಮಹಿಳೆಯರು, ನ್ಯಾಯಯುತ ಸಮಾಜಕ್ಕಾಗಿ ಮಹಿಳೆಯರು’ ಎಂಬ ಧ್ಯೇಯವಾಕ್ಯದೊಂದಿಗೆ ಅಕ್ಟೋಬರ್ 20ರವರೆಗೆ ನಡೆಯುವ ಈ ಸಮಾವೇಶದಲ್ಲಿ ದೇಶದ 80 ಧರ್ಮಕ್ಷೇತ್ರಗಳ ಬಿಷಪ್‌ಗಳು, ಧರ್ಮಗುರುಗಳು, ಕನ್ಯಾಸ್ತ್ರೀಯರು ಹಾಗೂ ಮಹಿಳಾ ಪ್ರತಿನಿಧಿಗಳು ಪಾಲ್ಗೊಂಡಿದ್ದಾರೆ.

ಸಾಂಸ್ಕೃತಿಕ ವೈವಿಧ್ಯದೊಂದಿಗೆ ಉದ್ಘಾಟನೆ :

ಡಾ. ಪ್ರೀತಿ ಕೀರ್ತಿ ಡಿಸೋಜ ಅವರ ನೇತೃತ್ವದಲ್ಲಿ ನಡೆದ ಸಾಂಸ್ಕೃತಿಕ ಮೆರವಣಿಗೆಯೊಂದಿಗೆ ಸಮ್ಮೇಳನಕ್ಕೆ ಚಾಲನೆ ನೀಡಲಾಯಿತು. ಛತ್ತೀಸ್‌ಗಢ ಮತ್ತು ಒಡಿಶಾದ ಗಿರಿಜನ ಮಹಿಳೆಯರು ಸಾಂಪ್ರದಾಯಿಕ ನೃತ್ಯ ಹಾಗೂ ಜಾನಪದ ಗೀತೆಗಳ ಮೂಲಕ ಗಣ್ಯರನ್ನು ಸ್ವಾಗತಿಸಿದರು. ಕರಾವಳಿಯ ಕೃಷಿ ಸಂಸ್ಕೃತಿ ಮತ್ತು ಸೌಹಾರ್ದತೆಯ ಸಂಕೇತವಾದ ಅಡಿಕೆ ಪಿಂಗಾರವನ್ನು ಅರಳಿಸುವ ಮೂಲಕ ಸಮ್ಮೇಳನವನ್ನು ವಿಶಿಷ್ಟವಾಗಿ ಉದ್ಘಾಟಿಸಲಾಯಿತು.

ಸಿಸಿಬಿಐ ಅಧ್ಯಕ್ಷ ಹಾಗೂ ಗೋವಾ–ದಮನ್‌ನ ಆರ್ಚ್‌ಬಿಷಪ್ ಕಾರ್ಡಿನಲ್ ಫಿಲಿಪ್ ನೇರಿ ಫೆರಾವೊ ಅವರನ್ನು ಮಹಿಳಾ ಆಯೋಗದ ರಾಷ್ಟ್ರೀಯ ಅಧ್ಯಕ್ಷರಾದ ಬಿಷಪ್ ಕಿಶೋರ್ ಕುಮಾರ್ ಕುಜೂರ್, ಬಿಷಪ್ ಆಂಟೋನಿಸ್ ಬಾರಾ, ರಾಷ್ಟ್ರೀಯ ಕಾರ್ಯದರ್ಶಿ ಭಗಿನಿ ಲಿಡ್ವಿನ್ ಫೆರ್ನಾಂಡಿಸ್, ಮಂಗಳೂರು ಧರ್ಮಕ್ಷೇತ್ರದ ಶ್ರೇಷ್ಠ ಗುರು ವಂದನೀಯ ಮ್ಯಾಕ್ಸಿಮ್ ಎಲ್. ನೊರೊನ್ಹಾ, ಕಣ್ಣೂರು ಧರ್ಮಕ್ಷೇತ್ರದ ವಿಕಾರ್ ಜನರಲ್ ಡಾ. ಜೋಯ್ ಪೈನಾಡತ್ ಹಾಗೂ ಉಡುಪಿಯ ಸಂಪದ ಸಂಸ್ಥೆಯ ನಿರ್ದೇಶಕ ವಂದನೀಯ ಫಾದರ್ ರೆಜಿನಾಲ್ಡ್ ಪಿಂಟೋ ಸೇರಿದಂತೆ ಗಣ್ಯರು ಸ್ವಾಗತಿಸಿದರು.

ನಿರ್ಧಾರ ಪ್ರಕ್ರಿಯೆಯಲ್ಲಿ ಮಹಿಳೆಯರಿಗೆ ಸಮಾನ ಅವಕಾಶಕ್ಕೆ ಕರೆ :

ವಿಶ್ವ ಮಿಷನ್ ರವಿವಾರದ ಶತಮಾನೋತ್ಸವದ ಅಂಗವಾಗಿ ದಿವ್ಯಬಲಿಪೂಜೆ ನೆರವೇರಿಸಿ ದಿಕ್ಸೂಚಿ ಭಾಷಣ ಮಾಡಿದ ಕಾರ್ಡಿನಲ್ ಫಿಲಿಪ್ ನೇರಿ ಫೆರಾವೊ ಅವರು ಮಿಷನ್ ಅಥವಾ ಸೇವೆ ಮಾನವ ಕಲ್ಪನೆಯಷ್ಟೇ ಅಲ್ಲ, ದೇವರಿಂದ ದೊರೆತ ಕೊಡುಗೆ ಎಂದು ಹೇಳಿದರು. ಚರ್ಚ್ ಮತ್ತು ಸಮಾಜದ ಅಭಿವೃದ್ಧಿಯಲ್ಲಿ ಮಹಿಳೆಯರು ಕೇವಲ ಸಹಾಯಕಿಯರಲ್ಲ; ಅವರು ಪ್ರಮುಖ ಪಾಲುದಾರರು ಎಂದು ಪ್ರತಿಪಾದಿಸಿದರು.

ಮಹಿಳೆಯರ ಮೇಲಿನ ತಾರತಮ್ಯ ಹಾಗೂ ಪುರುಷಪ್ರಧಾನ ವ್ಯವಸ್ಥೆಯ ಶೋಷಣೆಗಳನ್ನು ನಿವಾರಿಸಿ, ನಿರ್ಧಾರ ಕೈಗೊಳ್ಳುವ ಹಂತಗಳಲ್ಲಿ ಮಹಿಳೆಯರಿಗೆ ಸಮಾನ ಅವಕಾಶ ಕಲ್ಪಿಸಬೇಕೆಂದು ಕರೆ ನೀಡಿದರು. ‘ಮಿಷನ್ 2033’ ಉಪಕ್ರಮದಡಿ ಈಗಾಗಲೇ 46 ಧರ್ಮಕ್ಷೇತ್ರಗಳಲ್ಲಿ 35,000ಕ್ಕೂ ಹೆಚ್ಚು ಮಹಿಳೆಯರಿಗೆ ತರಬೇತಿ ನೀಡಲಾಗಿದೆ ಎಂದು ತಿಳಿಸಿದರು.

ಒಂಟಿ ತಾಯಂದಿರ ಸಬಲೀಕರಣಕ್ಕೆ ₹1 ಕೋಟಿ ನೆರವು:

ಸಮ್ಮೇಳನದ ಪ್ರಮುಖ ಆಕರ್ಷಣೆಯಾಗಿ ಮಂಗಳೂರು ಧರ್ಮಕ್ಷೇತ್ರದ ಮಹಿಳಾ ಆಯೋಗದ ‘ಮಾತ್ರೋನ್ನತಿ’ ಯೋಜನೆಗೆ ಚಾಲನೆ ನೀಡಲಾಯಿತು. ಒಂಟಿ ತಾಯಂದಿರ ಆರ್ಥಿಕ ಮತ್ತು ಸಾಮಾಜಿಕ ಸಬಲೀಕರಣವನ್ನು ಉದ್ದೇಶಿಸಿರುವ ಈ ಯೋಜನೆಗೆ ದೇಣಿಗೆದಾರ ಜಾನ್ ಸ್ಯಾಮ್ಯುಯೆಲ್ ಅವರು ತಮ್ಮ ದಿವಂಗತ ತಾಯಿ ರೋಸಿ ಸ್ಯಾಮ್ಯುಯೆಲ್ ಅವರ ಸ್ಮರಣಾರ್ಥ ₹1 ಕೋಟಿ ನಿಧಿಯನ್ನು ನೀಡಿದರು. ಈ ಮೊತ್ತವನ್ನು ಮಂಗಳೂರು ಧರ್ಮಕ್ಷೇತ್ರದ ಮಹಿಳಾ ಆಯೋಗದ ಕಾರ್ಯದರ್ಶಿ ಅನಿತಾ ಫ್ರಾಂಕ್ ಅವರಿಗೆ ಹಸ್ತಾಂತರಿಸಲಾಯಿತು.

ಸಮಾಜಸೇವಕಿಯರಿಗೆ ಗೌರವ, ಹೊಸ ಜವಾಬ್ದಾರಿ :

ಸಮಾಜಸೇವೆಯಲ್ಲಿ ಗಣನೀಯ ಕೊಡುಗೆ ನೀಡಿದ ವೈಟ್ ಡವ್ಸ್ ಸಂಸ್ಥೆಯ ಸ್ಥಾಪಕಿ ಕೊರಿನ್ ಆಂಟೋನೆಟ್ ರಸ್ಕಿನ್ಹಾ ಅವರಿಗೆ ಅವರ ಅನುಪಸ್ಥಿತಿಯಲ್ಲಿ ಹಾಗೂ ಅವೆ ಮರಿಯಾ ಪಾಲಿಯೇಟಿವ್ ಕೇರ್‌ನ ನಿರ್ದೇಶಕಿ ಡಾ. ಲವೀನಾ ನೊರೊನ್ಹಾ ಅವರಿಗೆ ಸನ್ಮಾನ ಸಲ್ಲಿಸಲಾಯಿತು.

ಇದೇ ಸಂದರ್ಭದಲ್ಲಿ ಮಂಗಳೂರು ಧರ್ಮಕ್ಷೇತ್ರದ ಮಹಿಳಾ ಆಯೋಗದ ಕಾರ್ಯದರ್ಶಿ ಅನಿತಾ ಫ್ರಾಂಕ್ ಅವರನ್ನು ಪ್ರಾದೇಶಿಕ ಮಹಿಳಾ ಆಯೋಗದ ನೂತನ ಕಾರ್ಯದರ್ಶಿಯಾಗಿ ನೇಮಕ ಮಾಡಿರುವುದಾಗಿ ಪ್ರಕಟಿಸಲಾಯಿತು.

ಡಿಜಿಟಲ್ ಸಂಪರ್ಕ ಮತ್ತು ಮಹಿಳಾ ಉದ್ಯಮಕ್ಕೆ ಪ್ರೋತ್ಸಾಹ:

ಅಪರಾಹ್ನದ ಗೋಷ್ಠಿಯಲ್ಲಿ ಸಿಸಿಬಿಐ ಮೀಡಿಯಾ ಅಪೋಸ್ಟಲೇಟ್‌ನ ಸಿಇಒ ನಿಗಿಲ್ ಫೆರ್ನಾಂಡಿಸ್ ಹಾಗೂ ಡಾ. ರೋಸ್ಲಿನ್ ರಾಜಾ ಅವರು ‘ಕ್ಯಾಥೋಲಿಕ್ ಕನೆಕ್ಟ್’ ಆ್ಯಪ್ ಕುರಿತು ಮಾಹಿತಿ ನೀಡಿದರು. ಮಹಿಳಾ ಉದ್ಯಮಿಗಳು ತಯಾರಿಸಿದ ಕರಕುಶಲ ವಸ್ತುಗಳು ಮತ್ತು ಉತ್ಪನ್ನಗಳ ಪ್ರದರ್ಶನಕ್ಕೂ ಚಾಲನೆ ನೀಡಲಾಯಿತು.

ಬಿಷಪ್ ಆಂಟೋನಿಸ್ ಬಾರಾ ಅವರ ಧನ್ಯವಾದ ಸಮರ್ಪಣೆಯೊಂದಿಗೆ ಮೊದಲ ದಿನದ ಕಾರ್ಯಕ್ರಮಗಳು ಮುಕ್ತಾಯಗೊಂಡವು. ಮಹಿಳಾ ಸಬಲೀಕರಣ, ಸಾಮಾಜಿಕ ನ್ಯಾಯ ಮತ್ತು ಸಮಾನತೆಯ ಕುರಿತು ಚರ್ಚೆ ಹಾಗೂ ಅನುಭವ ವಿನಿಮಯಕ್ಕೆ ವೇದಿಕೆಯಾಗಿರುವ ‘ಮಹಿಳೋತ್ಸವ 2026’ ಅಕ್ಟೋಬರ್ 20ರವರೆಗೆ ಮುಂದುವರಿಯಲಿದೆ.

ವರದಿ ಹಾಗೂ ಫೋಟೊಸ್

ವಂದನೀಯ ಫಾದರ್ ಅನಿಲ್ ಐವನ್ ಫೆರ್ನಾಂಡಿಸ್

ನಿರ್ದೇಶಕರು, ಕೆನರಾ ಕಮ್ಯೂನಿಕೇಷನ್ ಸೆಂಟರ್

ಮಂಗಳೂರು ಧರ್ಮಕ್ಷೇತ್ರ.