ಮಂಗಳೂರಿನಲ್ಲಿ ರೂಪಾಯಿ 90 ಕೋಟಿ ವೆಚ್ಚದಲ್ಲಿ 9 ಭಾಷೆಗಳಲ್ಲಿ 3 ಚಲನಚಿತ್ರಗಳ ನಿರ್ಮಾಣ – ಸಿಇಓ ಮರ್ರಿ ಗಿರಿ ರೆಡ್ಡಿ
ಉರ್ವ ಮಾರಿಯಮ್ಮ ದೇವಸ್ಥಾನದಲ್ಲಿಯೇ ಚಿತ್ರದ ಲಾಂಚ್ ಆಗಲಿದೆ
ಮಂಗಳೂರು : ಇಫ್ಫಿಮ್‌ಗಿ ಸ್ಟುಡಿಯೋಸ್ ಇಂಡಿಯನ್ ಫಿಲ್ಮ್ ಫ್ಯಾಶನ್ ಮೀಡಿಯಾ ನೆಟ್‌ವರ್ಕ್ ವತಿಯಿಂದ ಒಂಭತ್ತು ಭಾಷೆಗಳಲ್ಲಿ 3 ಚಲನಚಿತ್ರಗಳನ್ನು ನಿರ್ಮಿಸುವ ಗುರಿ ಹೊಂದಲಾಗಿದೆ ಎಂದು ಇಫ್ಫಿಮ್‌ಗಿ ಸ್ಟುಡಿಯೋದ ಸಿಇಒ ಮರ್ರಿ ಗಿರಿ ರೆಡ್ಡಿ ನವಂಬರ್ 29ರಂದು ಶುಕ್ರವಾರ ಮಂಗಳೂರು ಪ್ರೆಸ್ ಕ್ಲಬ್ ನಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಸುಮಾರು ರೂಪಾಯಿ 90 ಕೋಟಿ ವೆಚ್ಚದಲ್ಲಿ ಮೂರು ಚಲನಚಿತ್ರಗಳ ನಿರ್ಮಾಣವಾಗಲಿದೆ. ದಶಂಬರ್‌ನಲ್ಲಿ ಮಂಗಳೂರಿನಿಂದಲೇ ಶೂಟಿಂಗ್ ಆರಂಭವಾಗಲಿದೆ. ತೆಲುಗು, ತಮಿಳು, ಹಿಂದಿ, ಕನ್ನಡ ಇತ್ಯಾದಿ ಭಾಷೆಗಳಲ್ಲಿ ಚಿತ್ರ ನಿರ್ಮಾಣ ಮಾಡಲಾಗುವುದು. ಪ್ಯಾನ್ ಇಂಡಿಯಾ ಚಲನಚಿತ್ರ ಯೋಜನೆಗಳ ಭಾಗವಾಗಿ ಮೂರು ಚಿತ್ರಗಳನ್ನು ಏಕಕಾಲದಲ್ಲಿ ಆರಂಭಿಸಿ ವರ್ಷದೊಳಗೆ ಶೂಟಿಂಗ್ ಪೂರ್ಣಗೊಳಿಸುವ ಉದ್ದೇಶ ಹೊಂದಲಾಗಿದೆ. ಮಂಗಳೂರಿನ ಉರ್ವ ಮಾರಿಯಮ್ಮ ದೇವಸ್ಥಾನದಲ್ಲಿಯೇ ಚಿತ್ರದ ಲಾಂಚ್ ಆಗಲಿದೆ ಎಂದು ಅವರು ತಿಳಿಸಿದರು.
ಮಂಗಳೂರು, ಚಿಕ್ಕಮಗಳೂರು, ಕೂರ್ಗ್, ಊಟಿ, ಕೊಡೈಕೆನಾಲ್, ಕೇರಳ ಹಾಗೂ ವಿದೇಶಗಳಲ್ಲೂ ಚಿತ್ರೀಕರಣ ನಡೆಯಲಿದೆ. ದಶಂಬರ್ 6ರಂದು ಶಿವಮೊಗ್ಗ ಪ್ರೆಸ್ ಕ್ಲಬ್‌ನಲ್ಲಿ ಚಿತ್ರಗಳ ಪೋಸ್ಟರ್ ಬಿಡುಗಡೆಯಾಗಲಿದೆ ಎಂದು ವಿವರಿಸಿದರು.
