ಧರ್ಮಸ್ಥಳ ಸಾಮೂಹಿಕ ಶವ ಹೂತ ಪ್ರಕರಣ – ಪ್ರಮುಖ ದೂರುದಾರನನ್ನೇ ಬಂದಿಸಿದ ಎಸ್ಐಟಿ
ಧರ್ಮಸ್ಥಳದಲ್ಲಿ ಹಲವು ಕೊಲೆ ಪ್ರಕರಣಗಳ ಶವಗಳನ್ನು ಹೂತು ಹಾಕಿದ್ದೇನೆ ಎಂದು ಆರೋಪಿಸಿದ್ದ ಹಳೆಯ ಶೌಚಾಲಯ ಕಾರ್ಮಿಕನನ್ನೇ ವಿಶೇಷ ತನಿಖಾ ತಂಡ (ಎಸ್ಐಟಿ) ಬಂಧಿಸಿದೆ ಎಂದು ಆಗಸ್ಟ್ 23ರಂದು ಶನಿವಾರ ಪಿಟಿಐ ಮೂಲಗಳು ತಿಳಿಸಿವೆ. ಎಸ್ಐಟಿ ಮುಖ್ಯಸ್ಥ ಪ್ರಣಬ್ ಮೊಹಾಂತಿ ಅವರ ನೇತೃತ್ವದಲ್ಲಿ ನಿನ್ನೆ ಆಗಸ್ಟ್ 22ರಂದು ಶುಕ್ರವಾರ ದೂರುದಾರನನ್ನು ದೀರ್ಘಕಾಲ ವಿಚಾರಣೆ ನಡೆಸಲಾಗಿತ್ತು. ವಿಚಾರಣೆ ವೇಳೆ ನೀಡಿದ ಹೇಳಿಕೆಗಳು ಹಾಗೂ ದಾಖಲೆಗಳಲ್ಲಿ ತಾರತಮ್ಯ ಕಂಡುಬಂದ ಹಿನ್ನೆಲೆಯಲ್ಲಿ ಬಂಧನ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ದೀರ್ಘ ವಿಚಾರಣೆಯ ನಂತರ ಆರೋಪಿಯನ್ನು ವೈದ್ಯಕೀಯ ಪರೀಕ್ಷೆಗೆ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. 1995ರಿಂದ 2014ರವರೆಗೆ ಧರ್ಮಸ್ಥಳದಲ್ಲಿ ಕೆಲಸ ಮಾಡಿದ ಈ ವ್ಯಕ್ತಿ, ಅಪರಾಧ ಚಟುವಟಿಕೆಗಳಿಗೆ ಸಂಬಂಧಿಸಿದ ಶವಗಳನ್ನು ಬಲವಂತವಾಗಿ ಹೂತು ಹಾಕಲು ತಾನು ಒತ್ತಡಕ್ಕೊಳಗಾಗಿದ್ದೇನೆ ಎಂದು ದೂರಿದ್ದ. ಅದರ ಜೊತೆಗೆ ತಾನು ಹಳೆಯ ಶವ ಹೂತ ಸ್ಥಳಕ್ಕೆ ತೆರಳಿ, ಅಸ್ಥಿಪಂಜರದ ಅವಶೇಷಗಳನ್ನು ಕಂಡುಹಿಡಿದು ಫೋಟೋಗಳನ್ನು ಅಧಿಕಾರಿಗಳಿಗೆ ಸಲ್ಲಿಸಿದ್ದೇನೆ ಎಂದೂ ಹೇಳಿದ್ದ.
ಜುಲೈ 4ರಂದು ಎಸ್ಪಿ ಕಚೇರಿಗೆ ದೂರು ಸಲ್ಲಿಸಿದ ಬೆನ್ನಲ್ಲೇ ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ಭಾರತೀಯ ದಂಡ ಸಂಹಿತೆ (ಬಿಎನ್ಎಸ್) ಅಡಿಯಲ್ಲಿ ಪ್ರಕರಣ ದಾಖಲಾಗಿತ್ತು. ಇದಾದ ಎರಡು ದಿನಗಳ ನಂತರವೇ ಎಸ್ಐಟಿ ಶವ ಹೊರತೆಗೆಯುವ ಕೆಲಸ (exhumation) ಆರಂಭ ಮಾಡಿತು. ಮೊದಲ ಶವ ಹೂತ ಸ್ಥಳದಿಂದ ತನಿಖಾಧಿಕಾರಿಗಳು ಪ್ಯಾನ್ ಕಾರ್ಡ್ ಮತ್ತು ಡೆಬಿಟ್ ಕಾರ್ಡ್ ಪತ್ತೆ ಹಚ್ಚಿದ್ದರು. ಆ ಪ್ಯಾನ್ ಕಾರ್ಡ್ ಬೆಂಗಳೂರು ಗ್ರಾಮಾಂತರದ ನೆಲಮಂಗಲ ಮೂಲದ ಸುರೇಶ್ ಎಂಬಾತನದ್ದು ಎಂದು ಪತ್ತೆಯಾಗಿದೆ. ಆತ ಈ ವರ್ಷದ ಆರಂಭದಲ್ಲಿ ಪಿತ್ತಜ್ವರದಿಂದ ಮೃತಪಟ್ಟಿದ್ದು, ಸ್ವಗ್ರಾಮದಲ್ಲೇ ಅಂತ್ಯಕ್ರಿಯೆ ನಡೆದಿತ್ತು.
ಅಧಿಕಾರಿಗಳ ಪ್ರಕಾರ, ಮೃತನು ಮದ್ಯಾಸಕ್ತನಾಗಿದ್ದು, ಧರ್ಮಸ್ಥಳಕ್ಕೆ ಹಳೆಯ ಭೇಟಿ ವೇಳೆ ಪ್ಯಾನ್ ಕಾರ್ಡ್ ಕಳೆದುಹಾಕಿರುವ ಸಾಧ್ಯತೆ ಇದೆ ಎಂದು ತಿಳಿಸಿದ್ದಾರೆ. ಈ ಬೆಳವಣಿಗೆಯು ತನಿಖೆಗೆ ಹೊಸ ತಿರುವು ನೀಡಿದೆ.
ದೂರುದಾರ ಹೇಳಿಕೆಗಳಿಗೆ ಮತ್ತಷ್ಟು ಸಂಚಲನ ಮತ್ತು ದೂರುದಾರನ ಆರೋಪಗಳು
ಗುರುತನ್ನು ರಹಸ್ಯವಾಗಿಟ್ಟುಕೊಂಡಿರುವ ದೂರುದಾರನು ತಾನು ಅಪರಾಧಿಗಳನ್ನು ಗುರುತಿಸಬಹುದು ಹಾಗೂ ಶವ ಹೂತ ಸ್ಥಳಗಳನ್ನು ತೋರಿಸಬಹುದು ಎಂದು ಹೇಳಿದ್ದಾನೆ. ತನ್ನ ಹಾಗೂ ಕುಟುಂಬದ ಸುರಕ್ಷತೆಗೆ ಕಾನೂನು ರಕ್ಷಣೆಯ ಅಗತ್ಯವಿದೆ ಎಂದೂ ಮನವಿ ಸಲ್ಲಿಸಿದ್ದಾನೆ. ಅವನ ಪರ ವಕೀಲರು, ಕೊಲೆಯಾಗಿರುವವರ ರೇಖಾಚಿತ್ರಗಳನ್ನು (sketches) ಮುಂದಿನ ಹಂತದಲ್ಲಿ ನ್ಯಾಯಾಲಯಕ್ಕೆ ಸಲ್ಲಿಸಲಾಗುವುದು ಎಂದು ಹೇಳಿದ್ದಾರೆ.
ಎಸ್ಪಿ ಪ್ರತಿಕ್ರಿಯೆ
ದಕ್ಷಿಣ ಕನ್ನಡ ಜಿಲ್ಲಾ ಪೊಲೀಸ್ ಅಧೀಕ್ಷಕರಾದ ಅರುಣ್ ಕೆ. ರವರು “ದೂರುದಾರನು ಅಪರಾಧ ಚಟುವಟಿಕೆಗಳಲ್ಲಿ ಕೊಲೆಯಾದವರ ಶವಗಳನ್ನು ಗುಪ್ತವಾಗಿ ವಿಲೇವಾರಿ ಮಾಡಿದ್ದೇನೆ ಎಂದು ಹೇಳಿದ್ದಾನೆ. ಪಶ್ಚಾತ್ತಾಪದಿಂದ ಬಳಲುತ್ತಿದ್ದ ಆತ, ತನಗೆ ಮತ್ತು ತನ್ನ ಕುಟುಂಬಕ್ಕೆ ರಕ್ಷಣೆಯನ್ನು ಒದಗಿಸಿದಲ್ಲಿ ಅಪರಾಧಿಗಳ ವಿವರಗಳು ಹಾಗೂ ಶವ ಹೂತ ಸ್ಥಳಗಳನ್ನು ಬಹಿರಂಗಪಡಿಸಲು ಸಿದ್ಧನಿದ್ದೇನೆ ಎಂದು ಹೇಳಿದ್ದಾನೆ” ಎಂದು ತಿಳಿಸಿದ್ದಾರೆ. ಆದರೆ ಪತ್ತೆಯಾದ ಅಸ್ಥಿಪಂಜರದ ಅವಶೇಷಗಳ ನೈಜತೆಯ ಕುರಿತು ಅಥವಾ ಎಷ್ಟು ಮಂದಿ ಬಲಿಯಾದರು ಎಂಬುದರ ಕುರಿತು ಪೊಲೀಸರು ಇನ್ನೂ ದೃಢಪಡಿಸಿಲ್ಲ. ಧಾರ್ಮಿಕ ಮತ್ತು ಸಾಂಸ್ಕೃತಿಕ ಪರಂಪರೆಗಾಗಿ ಪ್ರಸಿದ್ಧವಾಗಿರುವ ಧರ್ಮಸ್ಥಳ, ಇಂತಹ ಆರೋಪಗಳಿಂದ ಗಂಭೀರ ಅಚ್ಚರಿಗೊಳಗಾಗಿದೆ.
ಎಲುಬು ಮೂಡಿಸಿದ ಪತ್ತೆಗಳು
ಈ ತಿಂಗಳ ಆರಂಭದಲ್ಲಿ ನೇತ್ರಾವತಿ ನದಿಯ ಹತ್ತಿರದ ಅರಣ್ಯ ಪ್ರದೇಶದಲ್ಲಿ, ಎಸ್ಐಟಿ ಒಟ್ಟು 15 ಎಲುಬುಗಳನ್ನು ಪತ್ತೆಹಚ್ಚಿತ್ತು. ಅವು ಮಾನವನ ಎಲುಬುಗಳಾಗಿರಬಹುದೆಂಬ ಶಂಕೆ ವ್ಯಕ್ತವಾಗಿದೆ. 13 ಶವ ಹೂತ ಸ್ಥಳಗಳಲ್ಲಿ ಆರನೆಯ ಸ್ಥಳದಲ್ಲಿ ತೋಡಿದಾಗ ಅವಶೇಷಗಳು ದೊರೆತಿವೆ. ಪ್ರಾಥಮಿಕ ಅಭಿಪ್ರಾಯ ನೀಡಿದ ವೈಜ್ಞಾನಿಕ ತಜ್ಞರ ಪ್ರಕಾರ, ಅವು ಪುರುಷನ ಎಲುಬುಗಳಾಗಿರಬಹುದೆಂದು ತೋರುತ್ತಿದೆ. ಆದರೆ, ಅಂತಿಮ ದೃಢೀಕರಣಕ್ಕಾಗಿ ಸಂಪೂರ್ಣ ಪರೀಕ್ಷೆ ಅಗತ್ಯವಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಈ ಬೆಳವಣಿಗೆ ಪ್ರಕರಣವನ್ನು ಇನ್ನಷ್ಟು ಗಂಭೀರವಾಗಿಸಿದೆ. ಸಾರ್ವಜನಿಕರಲ್ಲಿ ಆತಂಕ ಹೆಚ್ಚಿಸಿದ್ದು, ಎಸ್ಐಟಿ ಮುಂದಿನ ತನಿಖೆಯ ಮೇಲೆ ಎಲ್ಲರ ದೃಷ್ಟಿ ನೆಟ್ಟಿದೆ.
