ಶಿಖಾ ಸುಶೀಲ್ಗೆ ‘ಹಿಸ್ನಾ ಮಿಸ್ ದಾಯ್ಜಿವರ್ಲ್ಡ್–2026’ ಕಿರೀಟ
ಮಿಲಾಗ್ರಿಸ್ ಸಭಾಭವನದಲ್ಲಿ ನಡೆದ ಭವ್ಯ ಅಂತಿಮ ಸುತ್ತಿನಲ್ಲಿ ಮಂಗಳೂರು ಯುವತಿಯ ಸಾಧನೆ
ಮಂಗಳೂರಿನ ಪ್ರತಿಭಾವಂತ ಯುವತಿ ಶಿಖಾ ಸುಶೀಲ್ ಅವರು ‘ಹಿಸ್ನಾ ಮಿಸ್ ದಾಯ್ಜಿವರ್ಲ್ಡ್–2026’ ಕಿರೀಟವನ್ನು ಮುಡಿಗೇರಿಸಿಕೊಂಡು ನಗರಕ್ಕೆ ಹೆಮ್ಮೆ ತಂದಿದ್ದಾರೆ. ಫೆಬ್ರವರಿ 14ರಂದು ಶನಿವಾರ ರಾತ್ರಿ ನಗರದ ಮಿಲಾಗ್ರಿಸ್ ಸಭಾಭವನದಲ್ಲಿ ನಡೆದ ಭವ್ಯ ಅಂತಿಮ ಸುತ್ತಿನ ಸ್ಪರ್ಧೆಯಲ್ಲಿ ಶಿಖಾ ಸುಶೀಲ್ ಅವರನ್ನು ವಿಜೇತೆಯಾಗಿ ಘೋಷಿಸಲಾಯಿತು.
ಸಾವಿರಕ್ಕೂ ಹೆಚ್ಚು ಸ್ಪರ್ಧಿಗಳು ದೇಶ–ವಿದೇಶಗಳಿಂದ ಭಾಗವಹಿಸಿದ್ದ ಈ ಪ್ರತಿಷ್ಠಿತ ಸೌಂದರ್ಯ ಸ್ಪರ್ಧೆಯಲ್ಲಿ ದ್ವಿತೀಯ ಹಂತಕ್ಕೆ 25 ಸ್ಪರ್ಧಿಗಳು ಆಯ್ಕೆಯಾಗಿದ್ದರು. ಆತ್ಮಸ್ಥೈರ್ಯ, ಸ್ವಪರಿಚಯ, ರ್ಯಾಂಪ್ ವಾಕ್, ಪ್ರಶ್ನೋತ್ತರ ಹಾಗೂ ‘ಎಕ್ಸ್ ಫ್ಯಾಕ್ಟರ್’ ವಿಭಾಗಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಶಿಖಾ ಸುಶೀಲ್ ಅವರು ತೀರ್ಪುಗಾರರ ಮೆಚ್ಚುಗೆಗೆ ಪಾತ್ರರಾಗಿ ಕಿರೀಟಕ್ಕೆ ಭಾಜನರಾದರು.
ಸೆರೆನಾ ಎವ್ಜಿನ್ ಪ್ರಥಮ ರನ್ನರ್–ಅಪ್ ಪ್ರಶಸ್ತಿ ಪಡೆದುಕೊಂಡರೆ, ಫೇ ಮಾರ್ಟಿಸ್ ದ್ವಿತೀಯ ರನ್ನರ್–ಅಪ್ ಸ್ಥಾನಕ್ಕೆ ಆಯ್ಕೆಯಾದರು. ಹಿಸ್ನಾ ಇಂಟರ್ ನ್ಯಾಷನಲ್ ಸಂಸ್ಥೆಯ ನಿರ್ದೇಶಕರಾದ ರೊನಾಲ್ಡ್ ಪಿಂಟೊ ಹಾಗೂ ಅವರ ಪತ್ನಿ ಡೊರೊತಿ ಪಿಂಟೊ ವಿಜೇತರನ್ನು ಕಿರೀಟದೊಂದಿಗೆ ನಗದು ಬಹುಮಾನ ನೀಡಿ ಸನ್ಮಾನಿಸಿದರು. ಪ್ರಥಮ ವಿಜೇತಿಗೆ ₹3 ಲಕ್ಷ, ಪ್ರಥಮ ರನ್ನರ್–ಅಪ್ಗೆ ₹2 ಲಕ್ಷ ಮತ್ತು ದ್ವಿತೀಯ ರನ್ನರ್–ಅಪ್ಗೆ ₹1 ಲಕ್ಷ ನಗದು ಬಹುಮಾನ ನೀಡಲಾಯಿತು.
ಇದಲ್ಲದೆ, ಅಂತಿಮ ಸುತ್ತಿಗೆ ಪ್ರವೇಶಿಸಿದ ಇತರ ಒಂಭತ್ತು ಸ್ಪರ್ಧಿಗಳು ವೈಯಕ್ತಿಕ ಬಿರುದುಗಳೊಂದಿಗೆ ತಲಾ ₹25 ಸಾವಿರ ನಗದು ಬಹುಮಾನ ಪಡೆದುಕೊಂಡರು.
ಭಾರೀ ಸ್ಪರ್ಧೆ ನಡುವೆಯೂ ಶಿಖಾ ಸುಶೀಲ್ ಅವರ ಆತ್ಮವಿಶ್ವಾಸ ಮತ್ತು ಪ್ರತಿಭೆ ಮೆರೆಯಿತು. ಅವರ ಸಾಧನೆ ಮಂಗಳೂರಿನ ಯುವಜನತೆಗೆ ಪ್ರೇರಣೆಯಾಗಿದ್ದು, ನಗರದ ಹೆಸರನ್ನು ರಾಷ್ಟ್ರ–ಅಂತರಾಷ್ಟ್ರೀಯ ಮಟ್ಟದಲ್ಲಿ ಮತ್ತಷ್ಟು ಎತ್ತಿಹಿಡಿದಿದೆ.
