NITK ಆವರಣದಲ್ಲಿ ಆಕಾಶದ ‘ಯೋಧ’ನಿಗೆ ಶಾಶ್ವತ ನೆಲೆ; ಮಿಗ್-21 ಹೊಸ ಹೆಗ್ಗುರುತು
ರಾಷ್ಟ್ರೀಯ ಹೆದ್ದಾರಿ 66ರಿಂದಲೂ ಗೋಚರಿಸುವ ಯುದ್ಧ ವಿಮಾನ; ವಿದ್ಯಾರ್ಥಿಗಳಲ್ಲಿ ದೇಶಸೇವೆ, ಶಿಸ್ತು–ಶ್ರೇಷ್ಠತೆಯ ಪ್ರೇರಣೆಗೆ ಹೊಸ ಸಂಕೇತ
ಭಾರತೀಯ ವಾಯುಪಡೆಯ ಇತಿಹಾಸದಲ್ಲಿ ತನ್ನದೇ ಛಾಪು ಮೂಡಿಸಿರುವ ಮಿಗ್-21 ಯುದ್ಧ ವಿಮಾನ ಇದೀಗ NITK ಸುರತ್ಕಲ್‌ನ ಆವರಣದಲ್ಲಿ ಶಾಶ್ವತವಾಗಿ ನೆಲೆಗೊಂಡಿದ್ದು, ಸಂಸ್ಥೆಯ ಹೊಸ ಹೆಗ್ಗುರುತಾಗಿ ಗಮನ ಸೆಳೆದಿದೆ. ಎನ್‌ಐಟಿಕೆ ಮುಖ್ಯ ಕಟ್ಟಡದ ಮುಂಭಾಗದಲ್ಲಿ ಸ್ಥಾಪಿಸಲಾದ ನಿವೃತ್ತ ತರಬೇತಿ ವಿಮಾನವನ್ನು ಇಂದು ಅಕ್ಟೋಬರ್ 6ರಂದು ಮಂಗಳವಾರ ಅನಾವರಣಗೊಳಿಸಲಾಯಿತು.
NITK ಆಡಳಿತ ಮಂಡಳಿಯ ಅಧ್ಯಕ್ಷ ಎಂ.ಎಂ. ಮುರುಗಪ್ಪನ್, ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದ ಸಂಸದ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಹಾಗೂ ಎನ್‌ಐಟಿಕೆ ನಿರ್ದೇಶಕ ಪ್ರೊ. ಬಿ. ರವಿ ಅವರ ಉಪಸ್ಥಿತಿಯಲ್ಲಿ ಮಿಗ್-21 ವಿಮಾನವನ್ನು ಅನಾವರಣಗೊಳಿಸಲಾಯಿತು. ರಾಷ್ಟ್ರೀಯ ಹೆದ್ದಾರಿ 66ರಿಂದಲೂ ಸ್ಪಷ್ಟವಾಗಿ ಗೋಚರಿಸುವ ಈ ವಿಮಾನವು ಸುರತ್ಕಲ್‌ನ ಪ್ರಮುಖ ದೃಶ್ಯಾತ್ಮಕ ಹೆಗ್ಗುರುತಾಗಲಿದೆ. ಕಾರ್ಯಕ್ರಮದಲ್ಲಿ ಏರ್ ವಾರಿಯರ್ಸ್‌, ಸಶಸ್ತ್ರ ಪಡೆಗಳ ನಿವೃತ್ತ ಯೋಧರು, ಎನ್‌ಸಿಸಿ ಕೆಡೆಟ್‌ಗಳು, ಎನ್‌ಐಟಿಕೆಯ ಅಧಿಕಾರಿಗಳು, ಅಧ್ಯಾಪಕರು, ಸಿಬ್ಬಂದಿ, ವಿದ್ಯಾರ್ಥಿಗಳು ಹಾಗೂ ಹಳೆ ವಿದ್ಯಾರ್ಥಿಗಳು ಭಾಗವಹಿಸಿದ್ದರು.
ವಾಯುಪಡೆಯ ಇತಿಹಾಸದ ಸಾಕ್ಷಿಯಾಗಿ ಮಿಗ್-21:
ಏರ್ ಮಾರ್ಷಲ್ ಬಿ.ಯು. ಚೆಂಗಪ್ಪ ಮಾತನಾಡಿ, ಎನ್‌ಐಟಿಕೆಯಲ್ಲಿ ಸ್ಥಾಪಿಸಲಾಗಿರುವುದು ಮಿಗ್-21ನ ಎರಡು ಆಸನಗಳ ತರಬೇತಿ ಆವೃತ್ತಿಯಾಗಿದ್ದು, ಟ್ಯಾಂಡಂ ಕಾಕ್‌ಪಿಟ್ ಹೊಂದಿದೆ ಎಂದು ವಿವರಿಸಿದರು.
ಆರ್-13 ಟರ್ಬೋಜೆಟ್ ಎಂಜಿನ್ ಹೊಂದಿದ್ದ ಈ ವಿಮಾನವು ತನ್ನ ಡೆಲ್ಟಾ ಆಕಾರದ ರೆಕ್ಕೆಗಳಿಂದ ಚುರುಕು ಹಾಗೂ ಸ್ಥಿರ ಹಾರಾಟದ ಸಾಮರ್ಥ್ಯ ಹೊಂದಿತ್ತು. ಹೊರಾಂಗಣ ಗನ್ ಪಾಡ್ ಹಾಗೂ ರೆಕ್ಕೆಗಳ ಕೆಳಭಾಗದಲ್ಲಿ ಬಾಂಬ್‌ಗಳನ್ನು ಹೊತ್ತೊಯ್ಯುವ ಸಾಮರ್ಥ್ಯವನ್ನೂ ಹೊಂದಿತ್ತು. ಸೆಪ್ಟೆಂಬರ್ 2025ರವರೆಗೆ ಭಾರತೀಯ ವಾಯುಪಡೆಯಲ್ಲಿ ಸಕ್ರಿಯ ಸೇವೆಯಲ್ಲಿದ್ದ ಈ ವಿಮಾನವು ದೇಶದ ವಾಯುಪಡೆಯ ತರಬೇತಿ ವ್ಯವಸ್ಥೆಯ ಪ್ರಮುಖ ಭಾಗವಾಗಿತ್ತು ಎಂದು ಅವರು ತಿಳಿಸಿದರು.
ಯುವಜನರಿಗೆ ದೇಶಸೇವೆಯ ಪ್ರೇರಣೆಯಾಗಲಿ – ಸಂಸದ ಕ್ಯಾಪ್ಟನ್ ಬ್ರಿಜೇಶ್ ಚೌಟ:
ಸಂಸದರಾದ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಅವರು ಮಾತನಾಡಿ, ದಕ್ಷಿಣ ಕನ್ನಡದ ಯುವಕರಲ್ಲಿ ಸಶಸ್ತ್ರ ಪಡೆಗಳಲ್ಲಿ ಸೇವೆ ಸಲ್ಲಿಸುವ ಆಸಕ್ತಿ ಹೆಚ್ಚುತ್ತಿರುವುದು ಸಂತಸದ ಸಂಗತಿ ಎಂದರು. ಯುವಜನರಲ್ಲಿ ಸೇನಾ ಸೇವೆಯ ಮೌಲ್ಯಗಳು, ಶಿಸ್ತು ಹಾಗೂ ದೊರೆಯುವ ಅವಕಾಶಗಳ ಬಗ್ಗೆ ಇನ್ನಷ್ಟು ಜಾಗೃತಿ ಮೂಡಿಸುವ ಅಗತ್ಯವಿದೆ. ಎನ್‌ಐಟಿಕೆ ಆವರಣದಲ್ಲಿ ಮಿಗ್-21 ಸ್ಥಾಪನೆಯಾಗಿರುವುದು ವಿದ್ಯಾರ್ಥಿಗಳಿಗೆ ಕೇವಲ ಐತಿಹಾಸಿಕ ಯುದ್ಧ ವಿಮಾನವನ್ನು ನೋಡುವ ಅವಕಾಶವಲ್ಲ; ಅದು ದೇಶಸೇವೆ, ಶಿಸ್ತು, ಸಮರ್ಪಣೆ ಹಾಗೂ ಶ್ರೇಷ್ಠತೆಯ ಮೌಲ್ಯಗಳನ್ನು ಅಳವಡಿಸಿಕೊಳ್ಳುವ ಪ್ರೇರಣೆಯ ಸಂಕೇತವಾಗಬೇಕು ಎಂದು ಅವರು ಹೇಳಿದರು.
ಈ ಉಪಕ್ರಮವನ್ನು ಸಾಕಾರಗೊಳಿಸಲು ಶ್ರಮಿಸಿದ ಎನ್‌ಐಟಿಕೆ ನಿರ್ದೇಶಕ ಪ್ರೊ. ಬಿ. ರವಿ, ಏರ್ ಮಾರ್ಷಲ್ ಬಿ.ಯು. ಚೆಂಗಪ್ಪ, ಎಂ.ಎಂ. ಮುರುಗಪ್ಪನ್ ಹಾಗೂ ನಿವೃತ್ತ ಸೈನಿಕರಿಗೆ ಅವರು ಕೃತಜ್ಞತೆ ಸಲ್ಲಿಸಿದರು.
‘ಮಿಗ್-21 ಮುಂದಿನ ಪೀಳಿಗೆಗೆ ಪ್ರೇರಣೆಯ ಸಂಕೇತ’:
ಎನ್‌ಐಟಿಕೆ ಆಡಳಿತ ಮಂಡಳಿಯ ಅಧ್ಯಕ್ಷ ಎಂ.ಎಂ. ಮುರುಗಪ್ಪನ್ ಮಾತನಾಡಿ, ಎನ್‌ಐಟಿಕೆಯ ವಿದ್ಯಾರ್ಥಿಗಳು, ಅಧ್ಯಾಪಕರು ಹಾಗೂ ಹಳೆ ವಿದ್ಯಾರ್ಥಿಗಳು ದೇಶಕ್ಕೆ ಕೀರ್ತಿ ತಂದಿದ್ದಾರೆ. ರಾಷ್ಟ್ರ ನಿರ್ಮಾಣದಲ್ಲಿ ಸಂಸ್ಥೆಯ ಪಾತ್ರ ಇನ್ನಷ್ಟು ವಿಸ್ತರಿಸಬೇಕಿದೆ ಎಂದರು. ಮಿಗ್-21 ವಿಮಾನದ ಸ್ಥಾಪನೆಯು ಮುಂದಿನ ಪೀಳಿಗೆಗೆ ಪ್ರೇರಣೆಯಾಗುವುದರ ಜೊತೆಗೆ, ಬಲಿಷ್ಠ ರಾಷ್ಟ್ರ ನಿರ್ಮಾಣಕ್ಕೆ ಅಗತ್ಯವಾದ ಶಿಸ್ತು, ಮೌಲ್ಯಗಳು ಮತ್ತು ಗುರಿಯ ಮಹತ್ವವನ್ನು ನೆನಪಿಸುವ ಸಂಕೇತವಾಗಲಿದೆ ಎಂದು ಹೇಳಿದರು.
ಭಾರತೀಯ ವಾಯುಪಡೆಯ ಇತಿಹಾಸದಲ್ಲಿ ಮಿಗ್-21:
1950ರ ದಶಕದಲ್ಲಿ ಅಭಿವೃದ್ಧಿಪಡಿಸಲಾದ ಮಿಗ್-21 ಅಧಿಧ್ವನಿಗತಿಯ ಯುದ್ಧ ಹಾಗೂ ಪ್ರತಿರೋಧಕ ವಿಮಾನವಾಗಿದೆ. 1963ರಲ್ಲಿ ಭಾರತೀಯ ವಾಯುಪಡೆಗೆ ಸೇರ್ಪಡೆಗೊಂಡ ಈ ವಿಮಾನದ ಉತ್ಪಾದನೆಯನ್ನು ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ 1966ರಲ್ಲಿ ಸೋವಿಯತ್ ವಿನ್ಯಾಸ ಬ್ಯೂರೋದ ಪರವಾನಗಿಯಡಿ ನಾಸಿಕ್‌ನಲ್ಲಿ ಆರಂಭಿಸಿತು.
1965, 1971 ಹಾಗೂ 1999ರ ಯುದ್ಧಗಳಲ್ಲಿ ಭಾರತೀಯ ವಾಯುಪಡೆಯ ಭಾಗವಾಗಿ ಸೇವೆ ಸಲ್ಲಿಸಿದ ಮಿಗ್-21, ಹಲವು ದಶಕಗಳ ಕಾಲ ದೇಶದ ವಾಯು ರಕ್ಷಣೆಯಲ್ಲಿ ಮಹತ್ವದ ಪಾತ್ರ ವಹಿಸಿತು. 2025ರ ಸೆಪ್ಟೆಂಬರ್‌ನಲ್ಲಿ ತನ್ನ ಅಂತಿಮ ಸಾಂಪ್ರದಾಯಿಕ ಹಾರಾಟ ಪೂರ್ಣಗೊಳಿಸುವ ಮೂಲಕ ಭಾರತೀಯ ವಾಯುಪಡೆಯೊಂದಿಗಿನ ದೀರ್ಘ ಸೇವಾ ಅಧ್ಯಾಯವನ್ನು ಮುಕ್ತಾಯಗೊಳಿಸಿತು.
ಎರಡು ವರ್ಷಗಳ ಪ್ರಯತ್ನಕ್ಕೆ ಫಲ:
ಎನ್‌ಐಟಿಕೆ ಅಕಾಡೆಮಿ ಫಾರ್ ಡಿಫೆನ್ಸ್, ಅಡ್ವೆಂಚರ್ ಅಂಡ್ ಲೀಡರ್‌ಶಿಪ್ (ನಡಾಲ್)ನ ಪ್ರಭಾರ ಪ್ರಾಧ್ಯಾಪಕ ಡಾ. ಶ್ರೀನಿವಾಸ ರಾವ್ ಕೋಲಾ ಮಾತನಾಡಿ, ನಿವೃತ್ತ ವಿಮಾನವೊಂದನ್ನು ಎನ್‌ಐಟಿಕೆಗೆ ನೀಡುವಂತೆ ಭಾರತೀಯ ವಾಯುಪಡೆಯನ್ನು ಡಿಸೆಂಬರ್ 2023ರಲ್ಲಿ ಸಂಪರ್ಕಿಸಲಾಗಿತ್ತು ಎಂದು ತಿಳಿಸಿದರು.
ಭಾರತೀಯ ವಾಯುಪಡೆಯು 2026ರ ಜನವರಿಯಲ್ಲಿ ವಿಮಾನವನ್ನು ಎನ್‌ಐಟಿಕೆಗೆ ಹಂಚಿಕೆ ಮಾಡಿತು. ಜುಲೈನಲ್ಲಿ ವಿಮಾನದ ವಿವಿಧ ಭಾಗಗಳನ್ನು ಎನ್‌ಐಟಿಕೆಗೆ ಸಾಗಿಸಲಾಗಿದ್ದು, ಆಗಸ್ಟ್‌ನಲ್ಲಿ ಭಾರತೀಯ ವಾಯುಪಡೆಯ ತಂಡವು ವಿಮಾನವನ್ನು ಮರುಜೋಡಿಸಿತು. ಸೆಪ್ಟೆಂಬರ್‌ನಲ್ಲಿ ಅದರ ಸ್ಥಾಪನೆಗೆ ಮಾರ್ಗದರ್ಶನ ನೀಡಲಾಯಿತು.
ಮುಖ್ಯ ಕಟ್ಟಡದ ಹಿಂಭಾಗದಲ್ಲಿ ಸ್ಥಾಪಿಸಲಾದ ಟರ್ಬೋಶಾಫ್ಟ್ ಎಂಜಿನ್ ಸೇರಿದಂತೆ ಈ ಮಿಗ್-21 ವಿಮಾನವು ನಡಾಲ್, ಎನ್‌ಸಿಸಿ ಹಾಗೂ ಇತರ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವ ವಿದ್ಯಾರ್ಥಿಗಳಿಗೆ ವಾಯುಪಡೆ, ತಾಂತ್ರಿಕತೆ, ನಾಯಕತ್ವ ಮತ್ತು ದೇಶಸೇವೆಯ ಬಗ್ಗೆ ನೇರ ಪ್ರೇರಣೆಯನ್ನು ನೀಡಲಿದೆ ಎಂದು ಅವರು ಹೇಳಿದರು.
