ಮಂಗಳೂರು ಪುರಭವನದಲ್ಲಿ ಶ್ರಾವ್ಯ ಬಿ.ಎಸ್. ಅವರ ಭರತನಾಟ್ಯ ರಂಗಪ್ರವೇಶ – ಕಲಾಭಿಮಾನಿಗಳ ಮನಸೂರೆಗೊಂಡ ನೃತ್ಯ ವೈಭವ

“ಶ್ರಾವ್ಯಳ ನೃತ್ಯದಲ್ಲಿ ಶಾಂತಲೆಯ ಕಲಾನೈಪುಣ್ಯದ ಛಾಯೆ ಕಂಡಿತು” – ಕೊಂಡೆವೂರು ಶ್ರೀ ಯೋಗಾನಂದ ಸರಸ್ವತೀ ಸ್ವಾಮೀಜಿ

ಭಾರತೀಯ ಸಂಸ್ಕೃತಿ, ಪರಂಪರೆ ಮತ್ತು ಆಧ್ಯಾತ್ಮಿಕತೆಯ ಸೊಬಗನ್ನು ಪ್ರತಿಬಿಂಬಿಸುವ ಭರತನಾಟ್ಯವು ಕೇವಲ ಮನರಂಜನೆಯ ಕಲೆಯಲ್ಲ; ಅದು ದೇಶದ ಸಾಂಸ್ಕೃತಿಕ ಶ್ರೀಮಂತಿಕೆಯ ಪ್ರತೀಕವಾಗಿದೆ. ಮಂಗಳೂರು ಪುರಭವನದಲ್ಲಿ ಅಕ್ಟೋಬರ್ 23ರಂದು ಭಾನುವಾರ ನಡೆದ ಶ್ರಾವ್ಯ ಬಿ.ಎಸ್. ಅವರ ಭರತನಾಟ್ಯ ರಂಗಪ್ರವೇಶ ಸಮಾರಂಭದಲ್ಲಿ ನೃತ್ಯದ ಲಯ, ಭಾವ ಮತ್ತು ಅಭಿವ್ಯಕ್ತಿಯ ಸೊಬಗು ಕಲಾಭಿಮಾನಿಗಳ ಮನಸೂರೆಗೊಂಡಿತು.

ಸೌರಭ ಸಂಗೀತ ನೃತ್ಯ ಕಲಾ ಪ್ರತಿಷ್ಠಾನದ ವತಿಯಿಂದ, ನೃತ್ಯ ವಿದುಷಿ ಡಾ. ಶ್ರೀವಿದ್ಯಾ ಅವರ ಶಿಷ್ಯೆ ಶ್ರಾವ್ಯ ಬಿ.ಎಸ್. ಅವರ ರಂಗಪ್ರವೇಶದ ಅಂಗವಾಗಿ ಆಯೋಜಿಸಿದ್ದ ಧರ್ಮಸಭೆಯಲ್ಲಿ ಆಶೀರ್ವಚನ ನೀಡಿದ ಉಪ್ಪಳ ಕೊಂಡೆವೂರು ಮಠದ ಶ್ರೀ ಶ್ರೀ ಯೋಗಾನಂದ ಸರಸ್ವತೀ ಸ್ವಾಮೀಜಿ, ಶ್ರಾವ್ಯ ಅವರ ನೃತ್ಯ ಪ್ರತಿಭೆಯನ್ನು ಶ್ಲಾಘಿಸಿದರು.

ಶತಮಾನಗಳ ಹಿಂದೆ ಹೊಯ್ಸಳ ಸಾಮ್ರಾಜ್ಯದ ಕಲಾ ವೈಭವಕ್ಕೆ ಮೆರುಗು ನೀಡಿದ ನಾಟ್ಯರಾಣಿ ಶಾಂತಲೆಯ ಕಲಾನೈಪುಣ್ಯವನ್ನು ಶ್ರಾವ್ಯ ಅವರ ನೃತ್ಯ ಪ್ರದರ್ಶನ ನೆನಪಿಸಿತು. ಈ ಪ್ರತಿಭೆ ಮುಂದಿನ ದಿನಗಳಲ್ಲಿ ಆಧುನಿಕ ಶಾಂತಲೆಯಾಗಿ ಬೆಳೆದು ನೃತ್ಯ ಕ್ಷೇತ್ರಕ್ಕೆ ದಿಕ್ಕೂಚಿಯಾಗಲಿ ಎಂದು ಅವರು ಆಶೀರ್ವದಿಸಿದರು.

ಕಲೆಯ ಮೂಲಕ ಸಂಸ್ಕಾರಯುತ ಸಮಾಜ ನಿರ್ಮಾಣ ಸಾಧ್ಯ – ಡಾ. ಮೋಹನ್ ಆಳ್ವ

ಆಳ್ವಾಸ್ ಪ್ರತಿಷ್ಠಾನದ ಅಧ್ಯಕ್ಷ ಡಾ. ಮೋಹನ್ ಆಳ್ವ ಮಾತನಾಡಿ, ಕರ್ನಾಟಕ ಕಲಾ ತಿಲಕ ಮುರಳೀಧರ ರಾವ್ ಅವರ ಶಿಷ್ಯೆ ಡಾ. ಶ್ರೀವಿದ್ಯಾ ಅವರು ಅತಿ ಕಿರಿಯ ವಯಸ್ಸಿನಲ್ಲಿ ನೃತ್ಯ ಕ್ಷೇತ್ರದಲ್ಲಿ ಪಿಎಚ್.ಡಿ. ಪದವಿ ಗಳಿಸಿರುವ ಅಪರೂಪದ ಸಾಧಕಿ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ಇಂದು 200ಕ್ಕೂ ಅಧಿಕ ವಿದ್ಯಾರ್ಥಿಗಳು ಅವರಲ್ಲಿ ನೃತ್ಯ ತರಬೇತಿ ಪಡೆಯುತ್ತಿರುವುದು ಹೆಮ್ಮೆಯ ಸಂಗತಿ. ಕಲೆಯ ಮೇಲಿನ ಶ್ರದ್ಧೆ, ಭಕ್ತಿ, ಏಕಾಗ್ರತೆ ಮತ್ತು ರಂಗಪ್ರಸ್ತುತಿಯಲ್ಲಿನ ನವರಸಗಳ ಅಭಿವ್ಯಕ್ತಿ ಇಂದಿನ ಪೀಳಿಗೆಯಲ್ಲಿಯೂ ಉಳಿದು ಬೆಳೆಯಬೇಕಿದೆ. ಶ್ರೀವಿದ್ಯಾ ಅವರಂತಹ ಗುರುಗಳ ಮಾರ್ಗದರ್ಶನದಲ್ಲಿ ತರಬೇತಿ ಪಡೆಯುತ್ತಿರುವ ವಿದ್ಯಾರ್ಥಿಗಳು ಕಲೆಯ ಭವಿಷ್ಯದ ಬಗ್ಗೆ ಭರವಸೆ ಮೂಡಿಸುತ್ತಾರೆ ಎಂದರು.

ಉತ್ತಮ ಮನಸ್ಸು ಮತ್ತು ಸಂಸ್ಕಾರಯುತ ಸಮಾಜ ನಿರ್ಮಾಣಕ್ಕೆ ಕಲೆಯ ಬಗ್ಗೆ ಆಸಕ್ತಿ, ಸಮರ್ಪಣೆ ಹಾಗೂ ಬದ್ಧತೆ ಅಗತ್ಯ. ಈ ನಿಟ್ಟಿನಲ್ಲಿ ಶ್ರಾವ್ಯ ಅವರ ತಂದೆ ಶ್ರೀಕೃಷ್ಣ ಮಯ್ಯ ಮತ್ತು ತಾಯಿ ಬಬಿತಾ ಮಯ್ಯ ಅವರು ನೀಡಿದ ಪ್ರೋತ್ಸಾಹ ಅಭಿನಂದನಾರ್ಹವಾಗಿದೆ ಎಂದು ಹೇಳಿದರು.

 ಗುರುವಿನ ಮಾರ್ಗದರ್ಶನವೇ ಸಾಧನೆಯ ಶಕ್ತಿ – ಡಾ. ಶ್ರೀವಿದ್ಯಾ

ಶ್ರಾವ್ಯ ಅವರ ಗುರು ವಿದುಷಿ ಡಾ. ಶ್ರೀವಿದ್ಯಾ ಮಾತನಾಡಿ, ಒಳ್ಳೆಯ ಶಿಷ್ಯರಿಗೆ ಉತ್ತಮ ಗುರು ದೊರೆಯುವುದು ಸುಯೋಗ. ತನಗೆ ವಿದ್ವಾನ್ ಮುರಳೀಧರ ರಾವ್ ಅವರಂತಹ ಗುರುಗಳ ಮಾರ್ಗದರ್ಶನ ದೊರೆತಿರುವುದು ತನ್ನ ಕಲಾ ಬದುಕಿನ ದೊಡ್ಡ ಭಾಗ್ಯವಾಗಿದೆ ಎಂದರು.

ಗುರುಗಳಿಂದ ಕಲಿತ ಕಲಾತ್ಮಕತೆ, ನಾವೀನ್ಯತೆ ಮತ್ತು ಸೃಜನಶೀಲ ಚಿಂತನೆಯನ್ನು ತನ್ನ ಶಿಷ್ಯರಿಗೂ ಧಾರೆಯೆರೆಯಲು ಪ್ರಯತ್ನಿಸುತ್ತಿದ್ದೇನೆ. ಅದರ ಫಲವಾಗಿ ವಿದ್ಯಾರ್ಥಿಗಳು ಉತ್ತಮ ನೃತ್ಯಪಟುಗಳಾಗಿ ರೂಪುಗೊಂಡು ರಂಗಪ್ರವೇಶ ಮಾಡುತ್ತಿರುವುದು ಸಂತೋಷದ ಸಂಗತಿ ಎಂದು ಹೇಳಿದರು.

ಶ್ರಾವ್ಯ ಶ್ರದ್ಧೆ, ಏಕಾಗ್ರತೆ ಮತ್ತು ಪ್ರಾಮಾಣಿಕತೆಯಿಂದ ನೃತ್ಯವನ್ನು ಅಭ್ಯಾಸ ಮಾಡಿ ಪರಿಪಕ್ವತೆ ಸಾಧಿಸಿದ್ದಾಳೆ. ಸಂಗೀತ ಮತ್ತು ಚಿತ್ರಕಲೆಯಲ್ಲಿಯೂ ಆಸಕ್ತಿ ಹೊಂದಿರುವ ಆಕೆ ಭವಿಷ್ಯದಲ್ಲಿ ಅಪ್ರತಿಮ ಕಲಾವಿದೆ ಹಾಗೂ ನೃತ್ಯಗುರುವಾಗಿ ಗುರುತಿಸಿಕೊಳ್ಳಲಿ ಎಂದು ಹಾರೈಸಿದರು. ಮಗಳ ಕಲಾ ಪಯಣಕ್ಕೆ ನಿರಂತರ ಬೆಂಬಲ ನೀಡಿದ ತಂದೆ-ತಾಯಿಯ ಪಾತ್ರವನ್ನು ಅವರು ವಿಶೇಷವಾಗಿ ಶ್ಲಾಘಿಸಿದರು.

 ಗುರುವಿಗೆ ಕೃತಜ್ಞತೆ ಸಲ್ಲಿಸಿದ ಶ್ರಾವ್ಯ:

ತನ್ನ ರಂಗಪ್ರವೇಶದ ಅನುಭವ ಹಂಚಿಕೊಂಡ ಕುಮಾರಿ ಶ್ರಾವ್ಯ ಬಿ.ಎಸ್., ವಿದ್ವಾನ್ ಯು.ಕೆ. ಪ್ರವೀಣ್ ಅವರಿಂದ ಆರಂಭಿಕ ನೃತ್ಯ ತರಬೇತಿ ಪಡೆದ ಬಳಿಕ ವಿದುಷಿ ಡಾ. ಶ್ರೀವಿದ್ಯಾ ಅವರ ಮಾರ್ಗದರ್ಶನದಲ್ಲಿ ಕಲಿಕೆ ಮುಂದುವರಿಸಿದೆ ಎಂದು ತಿಳಿಸಿದರು.

ಆರಂಭದಲ್ಲಿ ಹೊಸ ಗುರುಗಳ ಬಳಿ ತರಬೇತಿ ಪಡೆಯುವ ಬಗ್ಗೆ ಸಣ್ಣ ಭಯವಿದ್ದರೂ, ದಿನ ಕಳೆದಂತೆ ಅವರ ಪ್ರೀತಿ, ಕಾಳಜಿ ಮತ್ತು ಅಪಾರ ಜ್ಞಾನವನ್ನು ಅರಿತುಕೊಂಡೆ. “ಭರತನಾಟ್ಯ ಒಂದು ಸಮುದ್ರವಿದ್ದಂತೆ; ಕಲಿತಷ್ಟು ಮುಗಿಯುವುದಿಲ್ಲ” ಎಂಬ ಗುರುಗಳ ಮಾತು ಸದಾ ತನಗೆ ಪ್ರೇರಣೆಯಾಗಿದೆ ಎಂದರು.

ತನ್ನನ್ನು ತಿದ್ದಿ, ತೀಡಿ, ಬಾಲ್ಯದ ಕನಸಾದ ರಂಗಪ್ರವೇಶವನ್ನು ನನಸಾಗಿಸಿದ ಗುರು ಡಾ. ಶ್ರೀವಿದ್ಯಾ ಅವರಿಗೆ ಹೃದಯಪೂರ್ವಕ ಕೃತಜ್ಞತೆ ಸಲ್ಲಿಸಿದರು. ತನ್ನ ಕಲಾ ಬದುಕಿನ ಪ್ರತಿಯೊಂದು ಹಂತದಲ್ಲಿಯೂ ಬೆನ್ನೆಲುಬಾಗಿ ನಿಂತ ತಂದೆ ಶ್ರೀಕೃಷ್ಣ ಮಯ್ಯ ಹಾಗೂ ತಾಯಿ ಬಬಿತಾ ಕೃಷ್ಣ ಮಯ್ಯ ಅವರ ತ್ಯಾಗ, ಪ್ರೀತಿ ಮತ್ತು ಪ್ರೋತ್ಸಾಹವನ್ನು ಸ್ಮರಿಸಿ ಭಾವುಕರಾದರು. ಕಾರ್ಯಕ್ರಮ ಯಶಸ್ವಿಯಾಗಲು ಸಹಕರಿಸಿದ ಸೌರಭ ತಂಡದ ಕಲಾವಿದರು, ಪೋಷಕರು, ಬಂಧುಮಿತ್ರರು ಮತ್ತು ಕಲಾಭಿಮಾನಿಗಳಿಗೂ ಧನ್ಯವಾದ ಅರ್ಪಿಸಿದರು.

ಕಲಾವಿದರಿಂದ ಶ್ರಾವ್ಯಳ ಪ್ರತಿಭೆಗೆ ಮೆಚ್ಚುಗೆ:

ಕರ್ನಾಟಕ ಕಲಾ ತಿಲಕ ಉಳ್ಳಾಲ ಮೋಹನ್ ಕುಮಾರ್ ಅವರು ಮಾತನಾಡಿ, ಶ್ರಾವ್ಯ ಪ್ರದರ್ಶಿಸಿದ ನೃತ್ಯಗಳಲ್ಲಿ ನೈಜತೆ, ವೈವಿಧ್ಯತೆ ಮತ್ತು ಪರಿಪೂರ್ಣತೆ ಎದ್ದು ಕಾಣುತ್ತಿತ್ತು. ಆಕೆಯ ಕಲಾ ಬದುಕು ಉಜ್ವಲವಾಗಲಿ ಹಾಗೂ ಡಾ. ಶ್ರೀವಿದ್ಯಾ ಅವರ ಶಿಷ್ಯರು ನಾಡಿನಾದ್ಯಂತ ಖ್ಯಾತಿ ಗಳಿಸಲಿ ಎಂದು ಹಾರೈಸಿದರು.

ಕಾರ್ಯಕ್ರಮದ ಆರಂಭದಲ್ಲಿ ನಟರಾಜ ಆರಾಧನೆ ಹಾಗೂ ನೃತ್ಯಗುರುಗಳಿಂದ ದೀಪಪ್ರಜ್ವಲನೆ ನಡೆಯಿತು. ಶ್ರಾವ್ಯ ಅವರ ಅಜ್ಜ, ಹಿರಿಯ ಕಲಾವಿದ ರಾಜಾ ಕಾರಂತ ಹಾಗೂ ತಂದೆ ಶ್ರೀಕೃಷ್ಣ ಮಯ್ಯ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.

ಶ್ರಾವ್ಯ ಅವರ ತಾಯಿ ಬಬಿತಾ ಕೃಷ್ಣ ಮಯ್ಯ ವಂದನಾರ್ಪಣೆ ಮಾಡಿದರು. ವಿದುಷಿ ಡಾ. ಶ್ರೀವಿದ್ಯಾ ಸ್ವಾಗತಿಸಿದರು. ವಿದುಷಿ ಡಾ. ಭ್ರಾಮರಿ ಶಿವಪ್ರಕಾಶ್ ಕಾರ್ಯಕ್ರಮ ನಿರೂಪಿಸಿದರು.

ಹಿಮ್ಮೇಳದ ಸಹಕಾರ: ಸಂಗೀತದಲ್ಲಿ ಕರ್ನಾಟಕ ಕಲಾಶ್ರೀ ವಿದ್ವಾನ್ ಬಾಲಸುಬ್ರಹ್ಮಣ್ಯ, ಮೃದಂಗದಲ್ಲಿ ವಿದ್ವಾನ್ ಕೆ.ಎಸ್. ಭವಾನಿ ಶಂಕರ್, ರಿದಮ್ ಪ್ಯಾಡ್‌ನಲ್ಲಿ ವಿದ್ವಾನ್ ಲಕ್ಷ್ಮೀನಾರಾಯಣ ಜಿ. ಹಾಗೂ ಕೊಳಲಿನಲ್ಲಿ ವಿದ್ವಾನ್ ನಿತೀಶ್ ಅಮ್ಮಣ್ಣಾಯ ಸಹಕರಿಸಿದರು. ಅವರ ಸಂಗೀತ ಸಹಕಾರ ನೃತ್ಯ ಪ್ರದರ್ಶನದ ಮೆರುಗನ್ನು ಹೆಚ್ಚಿಸಿತು.