November 18, 2026
Karavali Suddi | Bilingual Kannada/English Weekly Newspaper | ಕರಾವಳಿ ಸುದ್ದಿ - ಅರವಿನತ್ತ ನಮ್ಮ ಚಿತ್ತ
Follow Us
News

ಕೊಲ್ಲಿ ರಾಷ್ಟ್ರದ ಕನ್ನಡಿಗರ ಮನಗೆದ್ದ ಬಹುಮುಖ ಪ್ರತಿಭೆ ಜೈಸನ್ ಲಸ್ರಾದೊ ಇನ್ನಿಲ್ಲ

ಮಂಗಳೂರು: ಕೊಲ್ಲಿ ರಾಷ್ಟ್ರ ಕುವೈತ್‌ನ ಕನ್ನಡಿಗರ ಸಾಂಸ್ಕೃತಿಕ ಹಾಗೂ ಮನರಂಜನಾ ಲೋಕದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದ ಬಹುಮುಖ ಪ್ರತಿಭೆ, ಖ್ಯಾತ ನಿರೂಪಕ, ಗಾಯಕ, ನಟ ಹಾಗೂ ಸಂಗೀತಗಾರ 54 ವರ್ಷ ಪ್ರಾಯದ ಜೈಸನ್ ಲಸ್ರಾದೊ ಅವರು ಅನಾರೋಗ್ಯದಿಂದ ಇಂದು ನವಂಬರ್ 17ರಂದು ಮಂಗಳವಾರ ಮಂಗಳೂರಿನಲ್ಲಿ ನಿಧನರಾದರು.

ಜೈಸನ್ ಕೇವಲ ನಿರೂಪಕರಾಗಿರದೆ ಗಾಯಕ, ಸಂಗೀತಗಾರ, ನಟ, ಹಾಸ್ಯ ಕಲಾವಿದ, ನಿರ್ದೇಶಕ ಹಾಗೂ ಪ್ರತಿಭೆಗಳಿಗೆ ಮಾರ್ಗದರ್ಶನ ನೀಡುತ್ತಿದ್ದ ಬಹುಮುಖ ವ್ಯಕ್ತಿತ್ವದವರಾಗಿದ್ದರು. ಇಂಗ್ಲಿಷ್, ಹಿಂದಿ, ಕನ್ನಡ, ತುಳು, ಕೊಂಕಣಿ ಹಾಗೂ ಅರೇಬಿಕ್ ಭಾಷೆಗಳಲ್ಲಿ ನಿರರ್ಗಳವಾಗಿ ಕಾರ್ಯಕ್ರಮ ನಿರೂಪಿಸುವ ಸಾಮರ್ಥ್ಯ ಹೊಂದಿದ್ದ ಅವರು ಕುವೈತ್‌ನ ಮಂಗಳೂರು ಮೂಲದ ಜನರ ನಡುವೆ ಅಪಾರ ಜನಪ್ರಿಯತೆ ಗಳಿಸಿದ್ದರು.

ಮದುವೆ, ನಾಮಕರಣ, ಪ್ರಥಮ ಪರಮ ಪ್ರಸಾದ ಸ್ವೀಕಾರ ಸೇರಿದಂತೆ ವಿವಿಧ ಕುಟುಂಬ ಹಾಗೂ ಸಾಂಸ್ಕೃತಿಕ ಸಮಾರಂಭಗಳಲ್ಲಿ ಅವರ ನಿರೂಪಣೆ ವಿಶೇಷ ಮೆರುಗು ನೀಡುತ್ತಿತ್ತು. ಮಂಗಳೂರಿನ ಸಂಪ್ರದಾಯ, ಸಂಸ್ಕೃತಿ ಮತ್ತು ವಿವಿಧ ಧಾರ್ಮಿಕ ಆಚರಣೆಗಳ ಬಗ್ಗೆ ಅವರಿಗಿದ್ದ ಆಳವಾದ ತಿಳಿವಳಿಕೆ ಪ್ರೇಕ್ಷಕರನ್ನು ಸುಲಭವಾಗಿ ಸೆಳೆಯುತ್ತಿತ್ತು.

ಸಂಗೀತ ಕ್ಷೇತ್ರದಲ್ಲಿಯೂ ಜೈಸನ್ ಅವರ ಕೊಡುಗೆ ಗಮನಾರ್ಹವಾಗಿತ್ತು. ಅನೇಕ ಸಂಗೀತ ಕಾರ್ಯಕ್ರಮಗಳಲ್ಲಿ ಗಾಯಕರಾಗಿ ಪಾಲ್ಗೊಂಡಿದ್ದ ಅವರು ನಾಟಕ, ಹಾಸ್ಯ ರೂಪಕಗಳಲ್ಲಿ ನಟಿಸುವುದರ ಜೊತೆಗೆ ರಂಗಪ್ರದರ್ಶನಗಳನ್ನು ನಿರ್ದೇಶಿಸಿದ್ದರು. ಗಲ್ಫ್ ವಾಯ್ಸ್ ಆಫ್ ಮಂಗಳೂರು (GVOM) ಸಂಸ್ಥೆಯೊಂದಿಗೆ ಅವರ ಒಡನಾಟ ವಿಶೇಷವಾಗಿತ್ತು. 2012ರ GVOM ಸ್ಪರ್ಧೆಯಲ್ಲಿ ಸ್ಪರ್ಧಿಗಳಿಗೆ ತರಬೇತಿ ನೀಡುವ ಮೂಲಕ ಅವರ ಪ್ರತಿಭಾ ವಿಕಸನಕ್ಕೆ ಮಹತ್ವದ ಕೊಡುಗೆ ನೀಡಿದ್ದರು.

ಕುವೈತ್‌ನ ಮಂಗಳೂರು ಸಮುದಾಯದ ಸಾಮಾಜಿಕ, ಧಾರ್ಮಿಕ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿಯೂ ಅವರು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದರು. ವಿವಿಧ ಸಂಘಟನೆಗಳು, ಚರ್ಚ್ ಕಾರ್ಯಕ್ರಮಗಳು, ಗಾಯನ ತಂಡಗಳು, ಕಾರ್ಪೊರೇಟ್ ಸಮಾರಂಭಗಳು ಹಾಗೂ ದತ್ತಿ ಕಾರ್ಯಗಳಿಗೆ ತಮ್ಮ ಪ್ರತಿಭೆ ಮತ್ತು ಸಮಯವನ್ನು ಮೀಸಲಿಟ್ಟಿದ್ದರು. ನಿಧಿ ಸಂಗ್ರಹ ಕಾರ್ಯಕ್ರಮಗಳಲ್ಲಿಯೂ ಉಚಿತವಾಗಿ ಪಾಲ್ಗೊಂಡು ಸಮಾಜಮುಖಿ ಕಾರ್ಯಗಳಿಗೆ ನೆರವಾಗುತ್ತಿದ್ದರು.

ನೇರ ನಡೆನುಡಿ, ಶಿಸ್ತು ಹಾಗೂ ಸ್ಪಷ್ಟ ಅಭಿಪ್ರಾಯಗಳಿಗೆ ಹೆಸರಾಗಿದ್ದ ಜೈಸನ್ ಅವರಲ್ಲಿ ಮಕ್ಕಳ ಬಗ್ಗೆ ವಿಶೇಷ ಪ್ರೀತಿ ಮತ್ತು ಕಾಳಜಿ ಇತ್ತು. ಅವರ ಹಾಸ್ಯಪ್ರಜ್ಞೆ ಹಾಗೂ ಆತ್ಮೀಯ ಸ್ವಭಾವ ಸ್ನೇಹಿತರ ಬಳಗದಲ್ಲಿ ಸದಾ ಸಂತಸ ಮೂಡಿಸುತ್ತಿತ್ತು. ಮೃತರು ಪತ್ನಿ ರೀಮಾ ಸಲ್ಮಾ ಡಿಸೋಜ ಹಾಗೂ ಪುತ್ರಿ ರಿಯಾನ್ ಅವರನ್ನು ಅಗಲಿದ್ದಾರೆ.

ಜೈಸನ್ ಅವರ ನಿಧನದಿಂದ ಮಂಗಳೂರಿನ ಸಾಂಸ್ಕೃತಿಕ ಮತ್ತು ಮನರಂಜನಾ ಕ್ಷೇತ್ರದ ಬಹುಮುಖ ಪ್ರತಿಭೆಯೊಂದನ್ನು ಕಳೆದುಕೊಂಡಂತಾಗಿದೆ. ಅವರು ಹಾಡಿದ ಹಾಡುಗಳು, ಬೆಳೆಸಿದ ಪ್ರತಿಭೆಗಳು ಹಾಗೂ ತಮ್ಮ ನಿರೂಪಣೆಯ ಮೂಲಕ ಸ್ಮರಣೀಯವಾಗಿಸಿದ ಸಾವಿರಾರು ಕಾರ್ಯಕ್ರಮಗಳು ಅವರ ನೆನಪನ್ನು ಸದಾ ಜೀವಂತವಾಗಿರಿಸಲಿವೆ.

You may also like

News

ಜನವರಿ 3ರಂದು ಮಂಗಳೂರು ಧರ್ಮಕ್ಷೇತ್ರದ ಪರಮ ಪ್ರಸಾದದ ಮೆರವಣಿಗೆ – 10 ಸಾವಿರ ಭಕ್ತರ ನಿರೀಕ್ಷೆ

ಮಂಗಳೂರು ಧರ್ಮಕ್ಷೇತ್ರದ ವತಿಯಿಂದ 2027ರ ಜನವರಿ 3ರಂದು ಯೇಸು ಕ್ರಿಸ್ತರ ದೈವದರ್ಶನ ಮಹೋತ್ಸವದ (ಎಪಿಫನಿ) ಅಂಗವಾಗಿ ನಡೆಯಲಿರುವ ವಾರ್ಷಿಕ ಪರಮ ಪ್ರಸಾದದ ಮೆರವಣಿಗೆಗೆ ಸಿದ್ಧತೆಗಳು ಭರದಿಂದ ಸಾಗುತ್ತಿವೆ.
News

ಶಿಕ್ಷಣ, ಸಂಸ್ಕೃತಿ ಹಾಗೂ ಸಮಾಜಸೇವೆಯಲ್ಲಿ ಅಪೂರ್ವ ಸಾಧನೆಗೆ ಗೌರವದ ಗರಿ

ಬಳ್ಳಾರಿ ಬಿಷಪ್ ಡಾ. ಹೆನ್ರಿ ಡಿಸೋಜ ಅವರಿಗೆ ವಿಜಯನಗರ ಶ್ರೀಕೃಷ್ಣದೇವರಾಯ ವಿಶ್ವವಿದ್ಯಾಲಯದಿಂದ ಗೌರವ ಡಾಕ್ಟರೇಟ್ ಶಿಕ್ಷಣ, ಸಮಾಜಸೇವೆ, ಮಾಧ್ಯಮ, ಸಂಸ್ಕೃತಿ ಹಾಗೂ ಸಮಾಜದ ಹಿಂದುಳಿದ ಮತ್ತು ಅಂಚಿನಲ್ಲಿರುವ

You cannot copy content of this page