ಕೊರ್ಡೆಲ್ ‘ಬೃಹತ್ ಬೈಬಲ್ ಅಧಿವೇಶನ 2026’ – 3ನೇ ದಿನ ಗಲ್ಫ್ ರಾಷ್ಟ್ರಗಳಲ್ಲಿ ಶಾಂತಿಗಾಗಿ ವಿಶೇಷ ಪ್ರಾರ್ಥನೆ
ಇಂದು ಮಾರ್ಚ್ 1ರಂದು ಬೈಬಲ್ ಅಧಿವೇಶನ 2026 ಸಮಾರೋಪ
ಕುಲಶೇಕರದ ಹೋಲಿ ಕ್ರಾಸ್ ಚರ್ಚ್ ಇದರ ಬಯಲು ಮೈದಾನದಲ್ಲಿ ಮಂಗಳೂರು ಧರ್ಮಕ್ಷೇತ್ರದ ಕಾರಿಸ್ಮಾತಿಕ್ ಸರ್ವಿಸ್ ಕಮ್ಯುನಿಯನ್ ಹಾಗೂ ಬೈಬಲ್ ಆಯೋಗದ ಜಂಟಿ ಆಶ್ರಯದಲ್ಲಿ ನಡೆಯುತ್ತಿರುವ ‘ಬೃಹತ್ ಬೈಬಲ್ ಅಧಿವೇಶನ 2026’ರ ಮೂರನೇ ದಿನದ ಕಾರ್ಯಕ್ರಮಗಳು ಫೆಬ್ರವರಿ 28ರಂದು ಶನಿವಾರ ಅತೀವ ಭಕ್ತಿಭಾವದಿಂದ ಜರುಗಿದವು.
“ಜ್ಞಾನ ಮತ್ತು ಸ್ವೀಕಾರ: ಮಾರ್ಗದರ್ಶನ ನೀಡುವ ಮತ್ತು ಸ್ವೀಕರಿಸಲ್ಪಡುವ ದೇವರು” ಎಂಬ ಕೇಂದ್ರ ವಿಷಯದಡಿ ನಡೆದ ಈ ದಿನದ ಅಧಿವೇಶನವನ್ನು ವಿಶೇಷವಾಗಿ ಧರ್ಮಗುರುಗಳು ಮತ್ತು ಧಾರ್ಮಿಕ ಮುಖಂಡರಿಗಾಗಿ ಪ್ರಾರ್ಥಿಸಲು ಮೀಸಲಿಡಲಾಗಿತ್ತು.
ಪವಿತ್ರ ಜಪಮಾಲೆಯೊಂದಿಗೆ ಹಾಗೂ ಬ್ಲಾಸಮ್ ರೇಗೊ ಮತ್ತು ತಂಡದವರ ಭಕ್ತಿ ಸ್ತುತಿ ಗಾಯನದಿಂದ ದಿನದ ಕಾರ್ಯಕ್ರಮಗಳು ಆರಂಭಗೊಂಡವು. ನಂತರ ನಡೆದ ಪವಿತ್ರ ಬಲಿಪೂಜೆಯನ್ನು ಬೋಂದೆಲ್ ಚರ್ಚ್ನ ಧರ್ಮಗುರು ವಂದನೀಯ ಫಾದರ್ ಆ್ಯಂಡ್ರೂ ಲಿಯೋ ಡಿಸೋಜ ನೆರವೇರಿಸಿದರು. ‘ರೂಪಾಂತರದ ಭಾನುವಾರ’ದ ಹಿನ್ನೆಲೆಯಲ್ಲಿನ ತಮ್ಮ ಅರ್ಥಪೂರ್ಣ ಪ್ರವಚನದಲ್ಲಿ ಅವರು, ದೇವರ ವಾಕ್ಯದಿಂದ ಜೀವನದಲ್ಲಿ ರೂಪಾಂತರಗೊಳ್ಳುವ ಅಗತ್ಯತೆಯನ್ನು ಒತ್ತಿಹೇಳಿ, ಯೇಸುವಿನ ಧ್ವನಿಗೆ ಸದಾ ಕಿವಿಗೊಡಬೇಕೆಂದು ವಿಶ್ವಾಸಿಗಳನ್ನು ಕರೆ ನೀಡಿದರು.
ಖ್ಯಾತ ಗಾಯಕ ಮೆಲ್ವಿನ್ ಪೆರಿಸ್ ಅವರ ನೇತೃತ್ವದಲ್ಲಿ ಆಂಜಲೋರ್ ಚರ್ಚ್ ಗಾಯನ ಮಂಡಳಿಯ ಸುಮಧುರ ಗಾಯನವು ಬಲಿಪೂಜೆಗೆ ವಿಶೇಷ ಕಳೆ ತುಂಬಿತು. ಈ ವೇಳೆ ಪ್ರಸ್ತುತ ಯುದ್ಧದ ಸಂಕಷ್ಟವನ್ನು ಎದುರಿಸುತ್ತಿರುವ ಗಲ್ಫ್ ರಾಷ್ಟ್ರಗಳಲ್ಲಿ ಹಾಗೂ ವಿಶ್ವದೆಲ್ಲೆಡೆ ಶಾಂತಿ, ಸೌಹಾರ್ದತೆ ನೆಲೆಸುವಂತೆ ವಿಶೇಷ ಪ್ರಾರ್ಥನೆಗಳನ್ನು ಸಲ್ಲಿಸಲಾಯಿತು.
ಬಲಿಪೂಜೆಯಲ್ಲಿ ಕಾರಿಸ್ಮಾತಿಕ್ ಸರ್ವಿಸ್ ಕಮ್ಯುನಿಯನ್ನ ಆಧ್ಯಾತ್ಮಿಕ ನಿರ್ದೇಶಕ ವಂದನೀಯ ಫಾದರ್ ಕ್ಲಿಫರ್ಡ್ ಫೆರ್ನಾಂಡಿಸ್, ಬೈಬಲ್ ಆಯೋಗದ ಕಾರ್ಯದರ್ಶಿ ವಂದನೀಯ ಡಾ. ವಿನ್ಸೆಂಟ್ ಸಿಕ್ವೇರಾ, ಅಧಿವೇಶನದ ಪ್ರಧಾನ ನಿರೂಪಕ ಹಾಗೂ ಡಿಬಿಸಿಎಲ್ಸಿ (ಮಂಗಳಜ್ಯೋತಿ) ನಿರ್ದೇಶಕ ವಂದನೀಯ ಫಾದರ್ ರೋಹಿತ್ ಡಿಕೋಸ್ಟಾ, ಸಾರ್ವಜನಿಕ ಸಂಪರ್ಕಾಧಿಕಾರಿ ವಂದನೀಯ ಡಾ. ಜೆ.ಬಿ. ಸಲ್ಡಾನ್ಹಾ, ಸಿಬಿಇ ಕಾರ್ಯದರ್ಶಿ ವಂದನೀಯ ಫಾದರ್ ಲಿಯೋ, ಕೆನರಾ ಕಮ್ಯುನಿಕೇಷನ್ ಸೆಂಟರ್ ನಿರ್ದೇಶಕ ವಂದನೀಯ ಫಾದರ್ ಅನಿಲ್ ಐವನ್ ಫೆರ್ನಾಂಡಿಸ್, ಸಿಒಡಿಪಿ ನಿರ್ದೇಶಕ ವಂದನೀಯ ಫಾದರ್ ವಿನ್ಸೆಂಟ್ ಡಿಸೋಜ, ವಂದನೀಯ ಫಾದರ್ ಹ್ಯಾರಿ ಡಿಸೋಜ ಹಾಗೂ ಡೀಕನ್ ಡೆನ್ಜಿಲ್ ರೊಡ್ರಿಗಸ್ ಸೇರಿದಂತೆ ಹಲವು ಧರ್ಮಗುರುಗಳು ಪಾಲ್ಗೊಂಡರು.
ಬಲಿಪೂಜೆಯ ಬಳಿಕ ಬ್ರದರ್ ರೋನಿ ಡಿಸೋಜ ಮತ್ತು ತಂಡವು ಭಕ್ತಿ ಸ್ತುತಿ ಗಾಯನ ಮುಂದುವರಿಸಿದರು. ತರುವಾಯ ದೇವರ ವಾಕ್ಯದ ಕುರಿತು ಎರಡು ಪ್ರಮುಖ ಪ್ರವಚನಗಳು ನಡೆದವು. ಸಿಬಿಇ ಕಾರ್ಯದರ್ಶಿ ವಂದನೀಯ ಡಾ. ಲಿಯೋ ಅವರು “ಜ್ಞಾನದ ದೀಪ: ಆತ್ಮಸಾಕ್ಷಿ ಮತ್ತು ದೈವಿಕ ಮಾರ್ಗದರ್ಶನ” ಎಂಬ ಹಳೆ ಒಡಂಬಡಿಕೆಯ ವಿಷಯದ ಕುರಿತು ಮಾತನಾಡಿ, ದೇವರ ವಾಕ್ಯವು ಅಜ್ಞಾನದ ಕತ್ತಲೆಯನ್ನು ದೂರ ಮಾಡಿ, ನೈತಿಕ ಬದುಕಿಗೆ ದಾರಿದೀಪವಾಗುತ್ತದೆ ಎಂದು ವಿವರಿಸಿದರು.
ಜೆಪ್ಪು ಸೆಮಿನರಿಯ ಪ್ರಾಧ್ಯಾಪಕರಾದ ವಂದನೀಯ ಡಾ. ಜೆನ್ಸಿಲ್ ಆಳ್ವಾ ಅವರು “ಮರಿಯಮ್ಮ – ಆದರ್ಶ ಶಿಷ್ಯೆ: ದೇವರ ವಾಕ್ಯವನ್ನು ಹೃದಯದಲ್ಲಿ ಧ್ಯಾನಿಸುವುದು” ಎಂಬ ಹೊಸ ಒಡಂಬಡಿಕೆಯ ವಿಷಯದ ಮೇಲೆ ಪ್ರವಚನ ನೀಡಿ, ದೇವರ ವಾಕ್ಯಕ್ಕೆ ಸಂಪೂರ್ಣ ವಿಧೇಯರಾಗುವಲ್ಲಿ ತಾಯಿ ಮರಿಯಮ್ಮ ಅತ್ಯುತ್ತಮ ಮಾದರಿಯಾಗಿದ್ದಾರೆ ಎಂದು ತಿಳಿಸಿದರು.
ಕೊನೆಯಲ್ಲಿ ವಂದನೀಯ ಫಾದರ್ ಹ್ಯಾರಿ ಡಿಸೋಜ ಅವರ ನೇತೃತ್ವದಲ್ಲಿ ನಡೆದ ದಿವ್ಯಸತ್ಪ್ರಸಾದದ ಆರಾಧನೆಯೊಂದಿಗೆ ಮೂರನೇ ದಿನದ ಕಾರ್ಯಕ್ರಮಗಳು ಸಮಾಪ್ತಿಗೊಂಡವು. “ನಂಬಿಕೆಯ ವಿಧೇಯತೆ: ಅವರು ನಿಮಗೆ ಹೇಳಿದಂತೆ ಮಾಡಿ” (ಯೋಹಾನ 2:5) ಎಂಬ ವಿಷಯದಡಿ ನಡೆದ ಆರಾಧನೆಯ ಸಂದರ್ಭದಲ್ಲೂ ಧರ್ಮಗುರುಗಳ ಸೇವೆಗಾಗಿ ವಿಶೇಷ ಪ್ರಾರ್ಥನೆಗಳನ್ನು ಸಲ್ಲಿಸಲಾಯಿತು. ಸಹಸ್ರಾರು ವಿಶ್ವಾಸಿಗಳ ಪಾಲ್ಗೊಳ್ಳುವಿಕೆಯಲ್ಲಿ ನಡೆಯುತ್ತಿರುವ ಈ ನಾಲ್ಕು ದಿನಗಳ ಬೃಹತ್ ಆಧ್ಯಾತ್ಮಿಕ ಸಮಾವೇಶವು ಮಾರ್ಚ್ 1ರಂದು ಭಾನುವಾರ ಸಮಾರೋಪಗೊಳ್ಳಲಿದೆ.
ವರದಿ ಹಾಗೂ ಫೋಟೊ
ವಂದನೀಯ ಫಾದರ್ ಅನಿಲ್ ಐವನ್ ಫೆರ್ನಾಂಡಿಸ್
ನಿರ್ದೇಶಕರು ಕೆನರಾ ಕಮ್ಯುನಿಕೇಷನ್ ಸೆಂಟರ್
ಮಂಗಳೂರು ಧರ್ಮಕ್ಷೇತ್ರ
