ಜೆಪ್ಪು ಸಂತ ಅಂತೋನಿ ಪುಣ್ಯಕ್ಷೇತ್ರದಲ್ಲಿ ದಾನಿಗಳ ದಿನಾಚರಣೆ ಹಾಗೂ ಬಿಷಪ್ ಅವರ ಜನ್ಮದಿನದ ಸಂಭ್ರಮ

ಮಂಗಳೂರು ಧರ್ಮಕ್ಷೇತ್ರಕ್ಕೆ ಒಳಪಟ್ಟ ಜೆಪ್ಪುವಿನ ಸಂತ ಅಂತೋನಿ ಚಾರಿಟಿ ಸಂಸ್ಥೆಯ ವತಿಯಿಂದ ಆಶ್ರಮದ ಅಭಿವೃದ್ಧಿಗೆ ಸಹಕರಿಸುತ್ತಿರುವ ದಾನಿಗಳು ಮತ್ತು ಹಿತೈಷಿಗಳಿಗೆ ಕೃತಜ್ಞತೆ ಸಲ್ಲಿಸುವ “ದಾನಿಗಳ ದಿನಾಚರಣೆ” ಕಾರ್ಯಕ್ರಮವನ್ನು  ಏಪ್ರಿಲ್ 26ರಂದು ಭಾನುವಾರ ಆಶ್ರಮದ ‘ಸಂಭ್ರಮ’ ಸಭಾಂಗಣದಲ್ಲಿ ಭಕ್ತಿಪೂರ್ವಕವಾಗಿ ಆಚರಿಸಲಾಯಿತು.

ಮಂಗಳೂರು ಧರ್ಮಕ್ಷೇತ್ರದ ಬಿಷಪ್ ಪರಮಪೂಜ್ಯ ಅತೀ ವಂದನೀಯ ಡಾ. ಪೀಟರ್ ಪಾವ್ಲ್ ಸಲ್ಡಾನ್ಹಾ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೃತಜ್ಞತಾ ಬಲಿಪೂಜೆಯೊಂದಿಗೆ ಕಾರ್ಯಕ್ರಮಕ್ಕೆ ಚಾಲನೆ ದೊರಕಿತು. ತಮ್ಮ ಪ್ರವಚನದಲ್ಲಿ “ಯೇಸು ಕ್ರಿಸ್ತರು ಒಬ್ಬ ಉತ್ತಮ ಕುರುಬ” ಎಂಬ ವಿಷಯವನ್ನು ವಿವರಿಸಿದ ಬಿಷಪ್ ಅವರು, ಸಂತ ಅಂತೋನಿ ಆಶ್ರಮದ ದಾನಿಗಳನ್ನು ಈ ಉತ್ತಮ ಕುರುಬನಿಗೆ ಹೋಲಿಸಿ ಮಾತನಾಡಿದರು. “ದಾನಿಗಳು ತಮ್ಮ ಸಂಪನ್ಮೂಲಗಳನ್ನು ಹಂಚಿಕೊಳ್ಳುವ ಮೂಲಕ ಸಂಕಷ್ಟದಲ್ಲಿರುವವರ ನೋವನ್ನು ನಿವಾರಿಸುತ್ತಿದ್ದಾರೆ. ಅವರ ಪ್ರೀತಿ, ಕಾಳಜಿ ಮತ್ತು ಸಹಾನುಭೂತಿ ಯೇಸುವಿನ ಕರುಣೆಯ ಹೃದಯದ ಪ್ರತಿರೂಪವಾಗಿದೆ,” ಎಂದು ಅವರು ಮನದಾಳದ ಮಾತುಗಳನ್ನು ಹಂಚಿಕೊಂಡರು.

ಬಲಿಪೂಜೆಯ ಬಳಿಕ ನಡೆದ ಸಭಾ ಕಾರ್ಯಕ್ರಮದಲ್ಲಿ ಸಂಸ್ಥೆಯ ಆಡಳಿತಾಧಿಕಾರಿ ವಂದನೀಯ ಫಾದರ್ ಪ್ರವೀಣ್ ಅಮೃತ್ ಮಾರ್ಟಿಸ್ ಅವರು ಸ್ವಾಗತಿಸಿದರು. ಆಶ್ರಮದ ವಿದ್ಯಾರ್ಥಿಗಳು ಪ್ರಾರ್ಥನಾ ಗೀತೆಯೊಂದಿಗೆ ಕಾರ್ಯಕ್ರಮಕ್ಕೆ ಭಾವಪೂರ್ಣತೆ ತುಂಬಿದರು. ಸಂಸ್ಥೆಯ ನಿರ್ದೇಶಕರಾದ ವಂದನೀಯ ಜೆ.ಬಿ. ಕ್ರಾಸ್ತಾ ಅವರು ವಾರ್ಷಿಕ ವರದಿ ವಾಚಿಸಿ, ಮುಂದಿನ ಯೋಜನೆಗಳ ಬಗ್ಗೆ ವಿವರಿಸಿದರು.

ದಾನಿಗಳ ಪರವಾಗಿ ಮಾತನಾಡಿದ ಲವಿತಾ ಕ್ಯಾಸ್ಟೆಲಿನೊ ಅವರು, “ಸಂತ ಅಂತೋನಿ ಆಶ್ರಮವು ಕೇವಲ ಸೇವಾ ಕೇಂದ್ರವಲ್ಲ, ಅದು ಮನಸ್ಸಿಗೆ ಶಾಂತಿ ನೀಡುವ ಆಧ್ಯಾತ್ಮಿಕ ನೆಲೆ. ಇಲ್ಲಿ ಬರುವ ಪ್ರತಿಯೊಬ್ಬರಿಗೂ ಧೈರ್ಯ ಮತ್ತು ನೆಮ್ಮದಿ ದೊರಕುತ್ತದೆ,” ಎಂದು ತಮ್ಮ ಅನುಭವ ಹಂಚಿಕೊಂಡರು.

ಈ ಸಂದರ್ಭದಲ್ಲಿ ನರ್ಸಿಂಗ್ ವಿಭಾಗದಲ್ಲಿ ಉತ್ತಮ ಸಾಧನೆಗೈದ ಮನಿಶಾ ಪಿಂಟೊ ಅವರನ್ನು ಬಿಷಪ್ ಸನ್ಮಾನಿಸಿದರು. ಜೊತೆಗೆ, ಹಾಜರಿದ್ದ ದಾನಿಗಳಿಗೆ ಕೃತಜ್ಞತಾ ಸ್ಮರಣಿಕೆಗಳನ್ನು ವಿತರಿಸಲಾಯಿತು. ಕಾರ್ಯಕ್ರಮದ ವಿಶೇಷವಾಗಿ ಬಿಷಪ್ ಅವರ ಜನ್ಮದಿನ (ಏಪ್ರಿಲ್ 27)ವನ್ನು ಆಚರಿಸಲಾಯಿತು. ಆಶ್ರಮದ ನಿವಾಸಿಗಳು, ದಾನಿಗಳು ಹಾಗೂ ಸಂಸ್ಥೆಯ ಆಡಳಿತ ಮಂಡಳಿಯವರು ಬಿಷಪ್ ಅವರಿಗೆ ಹುಟ್ಟುಹಬ್ಬದ ಶುಭಾಶಯಗಳನ್ನು ತಿಳಿಸಿ ಗೌರವಿಸಿದರು.

ತಮ್ಮ ಅಧ್ಯಕ್ಷೀಯ ಭಾಷಣದಲ್ಲಿ ಬಿಷಪ್ ಅವರು ದಾನಿಗಳ ಉದಾರ ಮನೋಭಾವವನ್ನು ಶ್ಲಾಘಿಸಿ, “ನಿಮ್ಮ ಸೇವೆಯನ್ನು ದೇವರು ಖಂಡಿತವಾಗಿ ಆಶೀರ್ವದಿಸುತ್ತಾನೆ,” ಎಂದು ಹಾರೈಸಿದರು.

ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿಗಳಿಂದ ಬ್ಯಾಂಡ್ ವಾದನ ಹಾಗೂ ನೃತ್ಯ ಪ್ರದರ್ಶನಗಳು ಕೂಡ ನಡೆದವು. ಲ್ಯಾನ್ವಿನ್ ಡಿಸೋಜ ಕಾರ್ಯಕ್ರಮವನ್ನು ನಿರ್ವಹಿಸಿದರು. ವಂದನೀಯ ಫಾದರ್ ವಿವಿಯನ್ ರೊಡ್ರಿಗಸ್ ಧನ್ಯವಾದಗಳನ್ನು ಸಲ್ಲಿಸಿದರು. ವಂದನೀಯ ಗಿಲ್ಬರ್ಟ್ ಡಿಸೋಜ ಅವರು ಭೋಜನದ ಪೂರ್ವ ಪ್ರಾರ್ಥನೆ ನೆರವೇರಿಸಿದರು.

ವರದಿ:

ವಂದನೀಯ ಫಾದರ್ ಅನಿಲ್ ಫೆರ್ನಾಂಡಿಸ್

ನಿರ್ದೇಶಕರು, ಕೆನರಾ ಕಮ್ಯುನಿಕೇಷನ್ ಸೆಂಟರ್

ಮಂಗಳೂರು ಧರ್ಮಕ್ಷೇತ್ರ