November 20, 2026
Karavali Suddi | Bilingual Kannada/English Weekly Newspaper | ಕರಾವಳಿ ಸುದ್ದಿ - ಅರವಿನತ್ತ ನಮ್ಮ ಚಿತ್ತ
Follow Us
News

92 ರ ಸಂಭ್ರಮದಲ್ಲಿ ಸೂರಿಕುಮೇರು ಸೈಂಟ್ ಜೋಸೆಫ್ ಚರ್ಚ್

ಧರ್ಮಗುರುಗಳ ದೂರದೃಷ್ಟಿ, ಧರ್ಮಭಗಿನಿಯರ ಸಮರ್ಪಣೆ ಹಾಗೂ ಭಕ್ತಾದಿಗಳ ಒಗ್ಗಟ್ಟಿನ ಸೇವೆಗೆ ಸಾಕ್ಷಿಯಾದ ಆಧ್ಯಾತ್ಮಿಕ ಪಯಣ

ಸೂರಿಕುಮೇರು: ಹಸಿರು ಪೈರುಗದ್ದೆಗಳ ಮಡಿಲು, ಕಂಗೊಳಿಸುವ ಪ್ರಕೃತಿಯ ಸೌಂದರ್ಯ, ಪ್ರಶಾಂತ ಪರಿಸರದ ನಡುವೆ ಭವ್ಯವಾಗಿ ತಲೆ ಎತ್ತಿ ನಿಂತಿರುವ ಸುಂದರ ದೇವಾಲಯ. ನಂಬಿಕೆಯ ಬೆಳಕನ್ನು ಹರಡುತ್ತಾ, ಶಾಂತಿ ಮತ್ತು ಪ್ರೀತಿಯ ಸಂದೇಶವನ್ನು ಸಾರುತ್ತಾ, ತಲೆಮಾರುಗಳಿಂದ ಸಾವಿರಾರು ಭಕ್ತರ ಆಧ್ಯಾತ್ಮಿಕ ಬದುಕಿಗೆ ಆಶಾಕಿರಣವಾಗಿರುವ ಈ ದೇವಾಲಯವೇ ಬಂಟ್ವಾಳ ತಾಲೂಕಿನ ಮಾಣಿ ಗ್ರಾಮದ ಸೂರಿಕುಮೇರುವಿನಲ್ಲಿರುವ ಸೈಂಟ್ ಜೋಸೆಫ್ ಚರ್ಚ್.

ಬರಿಮಾರುವಿನಲ್ಲಿ 1893ರ ಸೆಪ್ಟೆಂಬರ್ 4ರಂದು ಆರಂಭಗೊಂಡ ಈ ದೇವಾಲಯದ ಧಾರ್ಮಿಕ ಪಯಣ, 1934ರ ನವೆಂಬರ್ 20ರಂದು ಸೂರಿಕುಮೇರುವಿಗೆ ಸ್ಥಳಾಂತರಗೊಳ್ಳುವ ಮೂಲಕ ಹೊಸ ಅಧ್ಯಾಯವನ್ನು ಆರಂಭಿಸಿತು. ಈ ಐತಿಹಾಸಿಕ ಸ್ಥಳಾಂತರದ 92 ವರ್ಷಗಳ ಸಂಭ್ರಮವನ್ನು 2026ರ ನವೆಂಬರ್ 20ರಂದು ಆಚರಿಸಲು ದೇವಾಲಯ ಸಾಕ್ಷಿಯಾಗುತ್ತಿದೆ. ಬರಿಮಾರುವಿನಲ್ಲಿ ಆರಂಭಗೊಂಡ ಧಾರ್ಮಿಕ ಪರಂಪರೆ, ಸೂರಿಕುಮೇರುವಿನಲ್ಲಿ ಭವ್ಯವಾಗಿ ಬೆಳೆದು, ಇಂದು ಆಧ್ಯಾತ್ಮಿಕತೆ, ಶಿಕ್ಷಣ, ಸಾಮಾಜಿಕ ಸೇವೆ ಹಾಗೂ ಸಾಮುದಾಯಿಕ ಒಗ್ಗಟ್ಟಿನ ಪ್ರತೀಕವಾಗಿ ಗುರುತಿಸಿಕೊಂಡಿದೆ.

ಇದು ಕೇವಲ ಒಂದು ದೇವಾಲಯದ 92 ವರ್ಷಗಳ ಇತಿಹಾಸವಲ್ಲ; ಬದಲಾಗಿ ಅನೇಕ ಧರ್ಮಗುರುಗಳ ತ್ಯಾಗ, ಧರ್ಮಭಗಿನಿಯರ ನಿಸ್ವಾರ್ಥ ಸೇವೆ, ಪೂರ್ವಜರ ದೂರದೃಷ್ಟಿ ಹಾಗೂ ತಲೆಮಾರುಗಳಿಂದ ಭಕ್ತಾದಿಗಳು ಬೆಳೆಸಿಕೊಂಡು ಬಂದಿರುವ ಅಚಲ ನಂಬಿಕೆ ಮತ್ತು ಪರಿಶ್ರಮದ ಸಾರ್ಥಕ ಕಥನವಾಗಿದೆ.

ಬರಿಮಾರುವಿನಲ್ಲಿ ಮೊಳಕೆಯೊಡೆದ ಆಧ್ಯಾತ್ಮಿಕ ಸೇವೆ:

ಸೈಂಟ್ ಜೋಸೆಫ್ ಚರ್ಚ್‌ನ ಇತಿಹಾಸದ ಪುಟಗಳನ್ನು ತೆರೆದಾಗ 1893ರ ಸೆಪ್ಟೆಂಬರ್ 4ರ ದಿನ ವಿಶೇಷ ಮಹತ್ವ ಪಡೆದುಕೊಳ್ಳುತ್ತದೆ. ಅಂದು ಮಂಗಳೂರು ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷರಾಗಿದ್ದ ಪರಮ ಪೂಜ್ಯ ಅತೀ ವಂದನೀಯ ಡಾ. ನಿಕೊಲಸ್ ಮರಿಯಾ ಪಗಾನಿಯವರ ಆದೇಶದಂತೆ ಮೊಗರ್ನಾಡ್ ದೇವಾಲಯದಿಂದ ಬೇರ್ಪಟ್ಟು, ವಂದನೀಯ ಫಾದರ್ ಕಾಂಬಿಲಸ್ ರೇಗೋರವರ ನೇತೃತ್ವದಲ್ಲಿ ಬಂಟ್ವಾಳ ತಾಲೂಕಿನ ಬರಿಮಾರು ಗ್ರಾಮದಲ್ಲಿ ಈ ದೇವಾಲಯ ಸ್ಥಾಪನೆಗೊಂಡಿತು.

ಆರಂಭದಲ್ಲಿ ಭಕ್ತಾದಿಗಳು ಸಲ್ಲಿಸಿದ ಮನವಿಯ ಮೇರೆಗೆ ಪುತ್ತೂರು ದೇವಾಲಯದ ಧರ್ಮಗುರುಗಳಾಗಿದ್ದ ವಂದನೀಯ ಫಾದರ್ ಸೆಬಾಸ್ಟಿಯನ್ ನೊರೊನ್ಹಾರವರನ್ನು ಖಾಯಂ ಧರ್ಮಗುರುಗಳನ್ನಾಗಿ ನೇಮಿಸಲಾಯಿತು. ಇದರಿಂದ ಈ ಭಾಗದಲ್ಲಿ ಕ್ರೈಸ್ತ ಸಮುದಾಯದ ಧಾರ್ಮಿಕ ಸಂಘಟನೆ ಹಾಗೂ ಆಧ್ಯಾತ್ಮಿಕ ಸೇವೆಗೆ ಭದ್ರ ಬುನಾದಿ ನಿರ್ಮಾಣವಾಯಿತು.

ಧಾರ್ಮಿಕ ಸೇವೆಯ ಜೊತೆಗೆ ಶಿಕ್ಷಣಕ್ಕೂ ಆದ್ಯತೆ ನೀಡಿದ ದೇವಾಲಯದ ವತಿಯಿಂದ 1903ರಲ್ಲಿ ಪ್ರಾಥಮಿಕ ಶಾಲೆಯನ್ನು ಆರಂಭಿಸಲಾಯಿತು. ವಂದನೀಯ ಫಾದರ್ ಡೆನ್ನಿಸ್ ಲೂವಿಸ್ ಅವರ ನಂತರ ಆಗಮಿಸಿದ ವಂದನೀಯ ಫಾದರ್ ಡೇವಿಡ್ ಕುವೆಲ್ಲೋ ಅವರು ದೇವಾಲಯ ಮತ್ತು ಶಾಲೆಯ ಮೂಲಭೂತ ಸೌಕರ್ಯಗಳ ಅಭಿವೃದ್ಧಿಗೆ ವಿಶೇಷ ಮುತುವರ್ಜಿ ವಹಿಸಿ, ಶಿಕ್ಷಣ ಹಾಗೂ ಧಾರ್ಮಿಕ ಕ್ಷೇತ್ರಗಳ ಪ್ರಗತಿಗೆ ಹೊಸ ದಿಕ್ಕು ನೀಡಿದರು.

1934ರ ನವೆಂಬರ್ 20ರಂದು ಸೂರಿಕುಮೇರುವಿನಲ್ಲಿ ಹೊಸ ಇತಿಹಾಸದ ಉದಯ:

ದೇವಾಲಯದ ಇತಿಹಾಸದಲ್ಲಿ 1934ರ ನವೆಂಬರ್ 20 ಒಂದು ಸುವರ್ಣಾಕ್ಷರಗಳಲ್ಲಿ ದಾಖಲಿಸಬೇಕಾದ ದಿನ. ಬರಿಮಾರುವಿನಲ್ಲಿ ಆರಂಭಗೊಂಡಿದ್ದ ಸೈಂಟ್ ಜೋಸೆಫ್ ಚರ್ಚ್ ಅನ್ನು ಸೂರಿಕುಮೇರುವಿಗೆ ಸ್ಥಳಾಂತರಿಸುವ ಮಹತ್ವದ ನಿರ್ಧಾರ ಕೈಗೊಳ್ಳಲಾಯಿತು. ಅಂದಿನ ಧರ್ಮಗುರುಗಳಾಗಿದ್ದ ವಂದನೀಯ ಫಾದರ್ ಲಿಯೋ ಕರ್ವಾಲ್ಲೊ ಅವರ ವಿಶೇಷ ಮುತುವರ್ಜಿಯಲ್ಲಿ ನೂತನ ಭವ್ಯ ದೇವಾಲಯ ನಿರ್ಮಾಣಗೊಂಡಿತು.

1934ರ ನವೆಂಬರ್ 20ರಂದು ಮಂಗಳೂರು ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷರಾಗಿದ್ದ ಪರಮ ಪೂಜ್ಯ ಅತೀ ವಂದನೀಯ ಡಾ. ವಿಕ್ಟರ್ ಫೆರ್ನಾಂಡಿಸ್ ಅವರ ದಿವ್ಯಹಸ್ತದಿಂದ ನೂತನ ದೇವಾಲಯ ಉದ್ಘಾಟನೆಗೊಂಡಿತು. ಈ ಸಂದರ್ಭದಲ್ಲಿ ದೇವಾಲಯಕ್ಕೆ ‘ಸೈಂಟ್ ಜೋಸೆಫ್ ಚರ್ಚ್ ಸೂರಿಕುಮೇರು ಬೊರಿಮಾರ್’ ಎಂದು ನಾಮಕರಣ ಮಾಡಲಾಯಿತು. ಕಂದಾಯ ಇಲಾಖೆಯ ದಾಖಲೆಗಳಲ್ಲಿಯೂ ಇದೇ ಹೆಸರನ್ನು ದಾಖಲಿಸಲಾಯಿತು.

ಅಂದಿನಿಂದ ಸೂರಿಕುಮೇರು ಬೊರಿಮಾರ್ ಎಂಬ ಹೆಸರು ಧಾರ್ಮಿಕ ವಲಯದಲ್ಲಿ ವಿಶೇಷ ಗುರುತನ್ನು ಪಡೆದುಕೊಂಡಿತು. ಕಾಲಚಕ್ರ ಉರುಳಿದಂತೆ ದೇವಾಲಯದ ಧಾರ್ಮಿಕ ಸೇವೆ, ಶೈಕ್ಷಣಿಕ ಚಟುವಟಿಕೆಗಳು ಹಾಗೂ ಸಾಮಾಜಿಕ ಕೊಡುಗೆಗಳು ವಿಸ್ತಾರಗೊಂಡವು. ನಂಬಿಕೆಯ ನೆಲೆಯಾಗಿ ಆರಂಭಗೊಂಡ ಈ ದೇವಾಲಯವು ಇಂದು ಅನೇಕ ಕುಟುಂಬಗಳ ಬದುಕಿನ ಅವಿಭಾಜ್ಯ ಅಂಗವಾಗಿ ಬೆಳೆದು ನಿಂತಿದೆ.

ತ್ಯಾಗ, ಸಮರ್ಪಣೆ ಮತ್ತು ಒಗ್ಗಟ್ಟಿನ ಫಲಶ್ರುತಿ:

ಯಾವುದೇ ಧಾರ್ಮಿಕ ಸಂಸ್ಥೆಯ ಬೆಳವಣಿಗೆಯ ಹಿಂದೆ ಕೇವಲ ಕಟ್ಟಡಗಳ ನಿರ್ಮಾಣವಿರುವುದಿಲ್ಲ. ಅದರ ಹಿಂದೆ ನಿಸ್ವಾರ್ಥವಾಗಿ ದುಡಿದ ಅನೇಕ ಹೃದಯಗಳ ಪರಿಶ್ರಮ, ಸೇವಾ ಮನೋಭಾವ ಮತ್ತು ಸಮರ್ಪಣೆ ಅಡಗಿರುತ್ತದೆ. ಸೈಂಟ್ ಜೋಸೆಫ್ ಚರ್ಚ್ ಸೂರಿಕುಮೇರು ಬೊರಿಮಾರ್‌ ಇದರ ಬೆಳವಣಿಗೆಯೂ ಇದಕ್ಕೆ ಹೊರತಾಗಿಲ್ಲ.

ಕಾಲಕಾಲಕ್ಕೆ ಸೇವೆ ಸಲ್ಲಿಸಿದ ಧರ್ಮಗುರುಗಳು ತಮ್ಮ ದೂರದೃಷ್ಟಿ ಮತ್ತು ಮಾರ್ಗದರ್ಶನದ ಮೂಲಕ ದೇವಾಲಯದ ಅಭಿವೃದ್ಧಿಗೆ ಶ್ರಮಿಸಿದ್ದಾರೆ. ಧರ್ಮಭಗಿನಿಯರು ಶಿಕ್ಷಣ, ಧಾರ್ಮಿಕ ಚಟುವಟಿಕೆ ಹಾಗೂ ಸಮುದಾಯದ ಸೇವೆಯಲ್ಲಿ ತಮ್ಮ ಅಮೂಲ್ಯ ಕೊಡುಗೆ ನೀಡಿದ್ದಾರೆ. ಹಿರಿಯರು ಹಾಕಿಕೊಟ್ಟ ಭದ್ರ ಬುನಾದಿಯನ್ನು ಇಂದಿನ ತಲೆಮಾರಿನವರು ಶ್ರದ್ಧೆ, ಭಕ್ತಿ ಮತ್ತು ಒಗ್ಗಟ್ಟಿನೊಂದಿಗೆ ಮುಂದುವರಿಸಿಕೊಂಡು ಬರುತ್ತಿದ್ದಾರೆ.

ದೇವಾಲಯವೆಂದರೆ ಕೇವಲ ಪ್ರಾರ್ಥನೆ ಸಲ್ಲಿಸುವ ಸ್ಥಳವಲ್ಲ; ಅದು ಪ್ರೀತಿ, ಕ್ಷಮೆ, ಸಹಬಾಳ್ವೆ, ಸಹೋದರತ್ವ ಮತ್ತು ಮಾನವೀಯ ಮೌಲ್ಯಗಳನ್ನು ಬೆಳೆಸುವ ಪವಿತ್ರ ತಾಣ. ಈ ಮೌಲ್ಯಗಳನ್ನು ತನ್ನ ಸೇವೆಯ ಮೂಲಕ ಸಮಾಜಕ್ಕೆ ಸಾರುತ್ತಾ ಬಂದಿರುವ ಸೈಂಟ್ ಜೋಸೆಫ್ ಚರ್ಚ್ ಸೂರಿಕುಮೇರು ಬೊರಿಮಾರ್, ಈ ಭಾಗದ ಧಾರ್ಮಿಕ ಹಾಗೂ ಸಾಮಾಜಿಕ ಬದುಕಿನಲ್ಲಿ ತನ್ನದೇ ಆದ ವಿಶಿಷ್ಟ ಸ್ಥಾನವನ್ನು ಗಳಿಸಿದೆ.

92 ವರ್ಷಗಳ ಪಯಣ – ಮುಂದಿನ ತಲೆಮಾರಿಗೆ ಸ್ಫೂರ್ತಿ:

1934ರ ನವೆಂಬರ್ 20ರಂದು ಸೂರಿಕುಮೇರುವಿನಲ್ಲಿ ಹೊಸ ಅಧ್ಯಾಯ ಆರಂಭಿಸಿದ ಈ ದೇವಾಲಯವು 2026ರ ನವೆಂಬರ್ 20ರಂದು ತನ್ನ 92 ವರ್ಷಗಳ ಸಾರ್ಥಕ ಪಯಣವನ್ನು ಪೂರ್ಣಗೊಳಿಸುತ್ತಿದೆ. ಬರಿಮಾರುವಿನಲ್ಲಿ 1893ರಲ್ಲಿ ಮೊಳಕೆಯೊಡೆದ ಧಾರ್ಮಿಕ ಸೇವೆಯ ಪರಂಪರೆ, ಸೂರಿಕುಮೇರುವಿನಲ್ಲಿ ಇನ್ನಷ್ಟು ವಿಸ್ತಾರಗೊಂಡು ಇಂದಿಗೂ ಭಕ್ತರ ಮನದಲ್ಲಿ ಅಚಲ ನಂಬಿಕೆಯ ದೀಪವಾಗಿ ಬೆಳಗುತ್ತಿದೆ.

ಈ 92 ವರ್ಷಗಳ ಪಯಣವನ್ನು ಸ್ಮರಿಸುವುದು ಎಂದರೆ ದೇವಾಲಯದ ಇತಿಹಾಸವನ್ನು ಮಾತ್ರ ನೆನಪಿಸಿಕೊಳ್ಳುವುದಲ್ಲ; ಅದಕ್ಕಾಗಿ ಶ್ರಮಿಸಿದ ಧರ್ಮಗುರುಗಳು, ಧರ್ಮಭಗಿನಿಯರು, ಪೂರ್ವಜರು ಹಾಗೂ ಸಮರ್ಪಿತ ಭಕ್ತಾದಿಗಳ ಸೇವೆಯನ್ನು ಗೌರವಿಸುವುದಾಗಿದೆ. ಅವರ ತ್ಯಾಗ ಮತ್ತು ಪರಿಶ್ರಮದ ಫಲವಾಗಿ ಇಂದು ಈ ಧರ್ಮಕೇಂದ್ರವು ಹೊಸ ತಲೆಮಾರಿಗೆ ಆಧ್ಯಾತ್ಮಿಕತೆ, ಸೇವೆ ಮತ್ತು ಒಗ್ಗಟ್ಟಿನ ಸಂದೇಶವನ್ನು ಸಾರುತ್ತಿದೆ.

ಕಾಲ ಬದಲಾಗಬಹುದು, ತಲೆಮಾರುಗಳು ಬದಲಾಗಬಹುದು; ಆದರೆ ನಂಬಿಕೆ, ಪ್ರೀತಿ ಮತ್ತು ಸೇವೆಯ ಮೌಲ್ಯಗಳು ಎಂದೆಂದಿಗೂ ಶಾಶ್ವತ. ಅಂತಹ ಮೌಲ್ಯಗಳನ್ನು ಹೃದಯಗಳಲ್ಲಿ ಬಿತ್ತುತ್ತಾ, ಬರಿಮಾರುವಿನಿಂದ ಸೂರಿಕುಮೇರುವಿನವರೆಗೆ ತನ್ನದೇ ಆದ ಇತಿಹಾಸವನ್ನು ನಿರ್ಮಿಸಿರುವ ಸೈಂಟ್ ಜೋಸೆಫ್ ಚರ್ಚ್ ಸೂರಿಕುಮೇರು ಬೊರಿಮಾರ್ ಇನ್ನೂ ಹಲವು ಶತಮಾನಗಳ ಕಾಲ ಆಧ್ಯಾತ್ಮಿಕ ಬೆಳಕನ್ನು ಪಸರಿಸಲಿ ಎಂಬುದೇ ಈ ಧರ್ಮಕೇಂದ್ರದ ಮೇಲಿನ ಎಲ್ಲಾ ಭಕ್ತಾದಿಗಳ ಹಾರೈಕೆ.

You may also like

News

ನವಂಬರ್ 25ರಂದು ದಕ್ಷಿಣ ಕನ್ನಡದಲ್ಲಿ ಬೃಹತ್ ರಕ್ತದಾನ ಅಭಿಯಾನ; 14 ರಕ್ತನಿಧಿ ಕೇಂದ್ರಗಳಲ್ಲಿ ಶಿಬಿರ – ಡಾ. ಎಚ್.ಆರ್. ತಿಮ್ಮಯ್ಯ

ಮಂಗಳೂರು: ತುರ್ತು ಸಂದರ್ಭಗಳಲ್ಲಿ ರಕ್ತದ ಕೊರತೆಯಿಂದ ಯಾವುದೇ ಜೀವ ಅಪಾಯಕ್ಕೆ ಸಿಲುಕಬಾರದು ಎಂಬ ಮಾನವೀಯ ಆಶಯದೊಂದಿಗೆ ನವೆಂಬರ್ 25ರಂದು ರಾಜ್ಯಾದ್ಯಂತ ಬೃಹತ್ ರಕ್ತದಾನ ಅಭಿಯಾನ ಹಮ್ಮಿಕೊಳ್ಳಲಾಗಿದೆ. ಇದರ
News

ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ, ಬಿಡಿ ಸಿಗರೇಟ್ ಮಾರಾಟಕ್ಕೆ ಕಡಿವಾಣ – ಕಠಿಣ ಕ್ರಮಕ್ಕೆ ADC ಕೆ. ರಾಜು ಸೂಚನೆ

ಮಂಗಳೂರು: ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನಕ್ಕೆ ಅವಕಾಶ ನೀಡುವ ಹಾಗೂ ಬಿಡಿಬಿಡಿಯಾಗಿ ಸಿಗರೇಟ್ ಮತ್ತು ತಂಬಾಕು ಉತ್ಪನ್ನಗಳನ್ನು ಮಾರಾಟ ಮಾಡುವ ಅಂಗಡಿ, ಹೋಟೆಲ್, ಕೆಫೆ ಮತ್ತು ಗೂಡಂಗಡಿಗಳ ವಿರುದ್ಧ

You cannot copy content of this page