ಬೆಂಗಳೂರಿನಲ್ಲಿ ಮುಸ್ಲಿಂ-ಕ್ರೈಸ್ತ ಮುಖಂಡರ ಐತಿಹಾಸಿಕ ಜಂಟಿ ಸಭೆ – ಅಲ್ಪಸಂಖ್ಯಾತರ ಹಕ್ಕುಗಳ ರಕ್ಷಣೆಗೆ ಒಗ್ಗೂಡಲು ನಿರ್ಧಾರ

ರಾಜ್ಯದಲ್ಲಿ ಅಲ್ಪಸಂಖ್ಯಾತ ಸಮುದಾಯಗಳ ಸಂವಿಧಾನಾತ್ಮಕ ಹಕ್ಕುಗಳ ರಕ್ಷಣೆ ಹಾಗೂ ಒಳಿತಿಗಾಗಿ ಮುಸ್ಲಿಂ ಮತ್ತು ಕ್ರೈಸ್ತ ಸಮುದಾಯಗಳ ಮುಖಂಡರು ಒಗ್ಗೂಡಿ ಹೋರಾಡಲು ನಿರ್ಧರಿಸಿದ್ದಾರೆ. ಸೆಪ್ಟೆಂಬರ್ 11ರಂದು ಶುಕ್ರವಾರ ಬೆಂಗಳೂರು ನಗರದ ಮಹಾಧರ್ಮಾಧ್ಯಕ್ಷರ ನಿವಾಸದಲ್ಲಿ ಕರ್ನಾಟಕ ಪ್ರದೇಶ ಮುಸ್ಲಿಂ ಒಕ್ಕೂಟ (KRMO) ದ ಪದಾಧಿಕಾರಿಗಳು ಹಾಗೂ ಕ್ರೈಸ್ತ ಮುಖಂಡರು ಬೆಂಗಳೂರು ಮಹಾಧರ್ಮಾಧ್ಯಕ್ಷರಾದ ಪರಮ ಪೂಜ್ಯ ಅತೀ ವಂದನೀಯ ಡಾ. ಪೀಟರ್ ಮಚಾದೋ ಅವರ ನೇತೃತ್ವದಲ್ಲಿ ಮಹತ್ವದ ಜಂಟಿ ಸಭೆ ನಡೆಸಿದರು.

ಸಭೆಯ ಪ್ರಮುಖ ಚರ್ಚಾಂಶಗಳು:

* ಮತಾಂತರ ನಿಷೇಧ ಕಾಯ್ದೆಯ ದುರುಪಯೋಗ: ಕಾಯ್ದೆಯ ಹೆಸರಿನಲ್ಲಿ ಮೂಲಭೂತವಾದಿ ಗುಂಪುಗಳಿಂದ ಅಲ್ಪಸಂಖ್ಯಾತ ಸಮುದಾಯಗಳ ಮುಗ್ಧ ಜನರಿಗೆ ಸಿಗುತ್ತಿರುವ ಕಿರುಕುಳ, ಹಿಂಸೆ ಹಾಗೂ ಸುಳ್ಳು ಪ್ರಕರಣಗಳ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಲಾಯಿತು.

* ದ್ವೇಷ ಭಾಷಣದ ವಿರುದ್ಧ ಖಂಡನೆ: ಅಲ್ಪಸಂಖ್ಯಾತರ ವಿರುದ್ಧ ಇತ್ತೀಚೆಗೆ ಹೆಚ್ಚುತ್ತಿರುವ ಉದ್ದೇಶಿತ ನಿಂದನೆ ಹಾಗೂ ದ್ವೇಷಪೂರಿತ ಭಾಷಣಗಳನ್ನು ಸಭೆಯು ಕಟುವಾಗಿ ಖಂಡಿಸಿತು.

ಸಂವಿಧಾನ ನೀಡಿರುವ ಮೂಲಭೂತ ಹಕ್ಕುಗಳ ರಕ್ಷಣೆಗೆ ಎಲ್ಲಾ ಅಲ್ಪಸಂಖ್ಯಾತ ಸಮುದಾಯಗಳು ಒಂದೇ ವೇದಿಕೆಯಲ್ಲಿ ಕೈಜೋಡಿಸುವುದು ಇಂದಿನ ಅಗತ್ಯವಾಗಿದೆ ಎಂದು ಮುಖಂಡರು ಒಮ್ಮತದಿಂದ ಅಭಿಪ್ರಾಯಪಟ್ಟರು.

ಕೈಗೊಂಡ ನಿರ್ಣಯಗಳು:

* ಅಲ್ಪಸಂಖ್ಯಾತರ ಸಾಮಾನ್ಯ ಸಮಸ್ಯೆಗಳನ್ನು ಎದುರಿಸಲು ಸದಾ ಸಕ್ರಿಯವಾಗಿರುವ ಜಂಟಿ ವೇದಿಕೆಯೊಂದನ್ನು ರಚಿಸುವುದು.

* ಶೀಘ್ರದಲ್ಲೇ ರಾಜ್ಯದ ಮಾನ್ಯ ಮುಖ್ಯಮಂತ್ರಿಗಳನ್ನು ಭೇಟಿ ಮಾಡಿ ಅಲ್ಪಸಂಖ್ಯಾತರ ಕಳವಳಗಳ ಕುರಿತು ಮನವಿ ಸಲ್ಲಿಸುವುದು.

* ಸಮುದಾಯದ ಶಾಸಕರು (MLAs) ಹಾಗೂ ಸಂಸದರನ್ನು (MPs) ಭೇಟಿ ಮಾಡಿ, ಈ ವಿಷಯಗಳನ್ನು ಶಾಸನಸಭೆ ಮತ್ತು ಸಂಸತ್ತಿನಲ್ಲಿ ಧ್ವನಿಸುವಂತೆ ಒತ್ತಾಯಿಸುವುದು.

ಪ್ರಮುಖ ನೇಮಕಗಳು:

ಈ ಕಾರ್ಯಕ್ರಮಗಳನ್ನು ಮುನ್ನಡೆಸಲು ಜಂಟಿ ಸಂಯೋಜಕರನ್ನು ಆಯ್ಕೆ ಮಾಡಲಾಗಿದೆ. KRMO ನಿಂದ ತನ್ವೀರ್ ಅಹ್ಮದ್ ಹಾಗೂ ಸುಹೇಲ್ ಅಹ್ಮದ್, ಮತ್ತು ಕ್ರೈಸ್ತ ಸಮುದಾಯದಿಂದ ವಂದನೀಯ ಫಾದರ್ ವಿನಯ್ ಕುಮಾರ್ ಹಾಗೂ DAPC ಸಹಾಯಕ ಆರ್ಚ್ ಬಿಷಪ್ ಸುನಿಲ್ ವಿ. ಜೇಕಬ್ ಸಂಯೋಜಕರಾಗಿ ಕಾರ್ಯನಿರ್ವಹಿಸಲಿದ್ದಾರೆ. ಅಲ್ಲದೆ, ಮುಖ್ಯಮಂತ್ರಿಗಳಿಗೆ ಸಲ್ಲಿಸಬೇಕಾದ ವರದಿಯನ್ನು ಸಿದ್ಧಪಡಿಸಲು 4 ಸದಸ್ಯರ ವಿಶೇಷ ತಂಡವನ್ನು ರಚಿಸಲಾಗಿದೆ.

ಈ ಜಂಟಿ ಸಭೆಯಲ್ಲಿ DAPC ಆರ್ಚ್‍ಬಿಷಪ್ ವಿನೋದ್ ಎಂ. ಚಾಕೋ, ಸಹಾಯಕ ಆರ್ಚ್ ಬಿಷಪ್ ಸುನಿಲ್ ವಿ. ಜೇಕಬ್, ಬಿಷಪ್ ವೆನಿಯಲ್ ಮೋಸಸ್, ಬೆಂಗಳೂರು ಮಹಾ ಧರ್ಮಕ್ಷೇತ್ರದ ಸಹಾಯಕ ಬಿಷಪ್ ಗಳಾದ ಅತೀ ವಂದನೀಯ ಡಾ. ಆರೋಗ್ಯರಾಜ್ ಸತೀಶ್, ಅತೀ ವಂದನೀಯ ಡಾ. ಜೋಸೆಫ್ ಸುಸೈನಾತನ್, ಪಾಸ್ಟರ್ ಎಂ. ಜೋನ್ ಮೊಸೆಸ್, ಪಾವ್ಲ್ ಅಮೃತ್ ರಾಜ್, ADF ಕರ್ನಾಟಕದ ಪಾಸ್ಟರ್ ಲೂಕಸ್, ಕರ್ನಾಟಕ ರಾಜ್ಯ ಮುಸ್ಲಿಂ ಒಕ್ಕೂಟದ ಸಂಚಾಲಕರಾದ ಮುಹಮ್ಮದ್ ಯಾಸೀನ್ ಮಲ್ಪೆ, ಸುಹೈಲ್ ಅಹಮ್ಮದ್ ಮರೂರ್, ಯಾಹ್ಯಾ ದಾಮೋದಿ, ಹರೀಸ್ ಸಿದ್ದಿಕಿ, ತನ್ವೀರ್‍ ಅಹಮ್ಮದ್, ದಲಿತ ಕ್ರೈಸ್ತ ಒಕ್ಕೂಟದ ಮುಖ್ಯಸ್ಥ ರೆವರೆಂಡ್ ಫಾದರ್ ಮನೋಹರ್ ಚಂದ್ರ ಪ್ರಸಾದ್, ಪೆರಿಕೊ ಪ್ರಭು, ಫಾದರ್ ವಿನಯ್ ಕುಮಾರ್, ವಕೀಲರಾದ ರಾಬಿನ್ ಕ್ರಿಸ್ಟೋಫರ್, ಝಿಶಾನ್ ರಝ್ವಿ ಮತ್ತು ಆರ್ಚ್ ಬಿಷಪ್ ಅವರ ಸಾರ್ವಜನಿಕ ಸಂಪರ್ಕಾಧಿಕಾರಿ ಕಾಂತರಾಜ್ ಸೇರಿದಂತೆ ಇನ್ನಿತರರು ಉಪಸ್ಥಿತರಿದ್ದರು.